Мисрда ҳукмронлик қилаётган фавқулодда жазирама қурбонлари сони 100 кишидан ошиб кетди. Бу ҳақда «ТАСС» хабар бермоқда.
«Иссиқлик зарбалари натижасида ўтган ҳафта бошидан то жорий душанбага қадар 105 та ўлим ҳолати қайд этилди. Биргина Қоҳира ва унинг атрофида 54 нафар мисрлик ҳалок бўлган», — деди Миср Соғлиқни сақлаш вазирлиги вакили Ҳусам Абдул Ғаффор.
Жазирама сабаб бутун мамлакат бўйлаб умумий ҳисобда 2395 нафар киши тиббиёт муассасаларига ётқизилган, мингдан ортиқ одам шифокорлар назорати остида қолмоқда.
Иссиқ иқлим шароитидан кекса ёшдаги кишилар, болалар, шунингдек, сурункали юрак-қон томир касалликлари, қандли диабети бор, қон босими юқори бўлган кишилар айниқса кўп азият чекмоқда.
Сўнгги бир неча кундан бери Мисрнинг аксарият вилоятларида ҳаво ҳарорати 40 даража иссиқдан паст бўлаётгани йўқ, жанубий ҳудудларда эса ҳарорат 50 даража иссиқдан ошиши ҳолатлари ҳам қайд этилмоқда.
Изоҳ (0)