Жаҳондаги энг кучли болакай

Жулиано Строе жаҳондаги энг кучли болакай ҳисобланади. У 2004 йил 18 июль куни Руминияда туғилган, 2009 йилда — атиги беш ёшида у бутун дунёга танилди ва Гиннеснинг рекордлар китобидан ўрин олди. «Sports.ru»нинг ёзишича, у мураккаб трюкни бажариб — оёқлари орасига оғирлиги 15 килограмм бўлган гимнастикачилар тўпини қистирганча, ўн метр масофани қўлда босиб ўтиб, Рекордлар китобидан жой олган.

Жаҳондаги энг кучли болакай икки ёшлигидаёқ отаси назорати остида спорт билан шуғулланишни бошлаган. Жулианонинг отаси, ўз вақтида гимнастикачи-спортчи бўлган Иулиэн Строе фарзандини ҳар доим ўзи билан тренажёр залига олиб борарди. Улар дастлаб оддий машқларни бажаришдан бошлаб, сўнг нисбатан мураккаб машғулотларга киришган.

Ҳозирги вақтда жаҳоннинг энг кучли болакайи кўплаб мусобақалар ва спорт томошаларида қатнашмоқда. Бундан ташқари, Жулиано Строе 2013 йилдан бери Гиннеснинг рекордлар китоби учун янгидан-янги рекордларни ўрнатишдан чарчамаяпти. У сўнгги трюкларидан бирида ерга параллел равишда жойлаштирилган ёғоч қозиқларга таянган ҳолда машқларни бажарди. Жулиано мазкур машқни 20 марта бажариб, бирор марта ҳам оёғи билан ерга тегинмади.

Иулиэннинг таъкидлашича, Жулиано оддий болалардек ҳаёт кечиради. У ҳар доим ўзи истаган миқдорда шуғулланади. Машғулотлардан бўш вақтида эса ўйнайди, расм чизади, мультфильмлар томоша қилади ва тенгдошлари билан мулоқотда бўлади.