Мексика президенти Энрике Пенья Ньето ўт пуфагидаги операциядан икки ой ўтиб, ўзининг қўриқлаш хизмати томонидан йилда бир маротаба ташкил этиладиган югуриш мусобақасида қатнашди. Бу ҳақда «ТАСС» хабар бермоқда.
Мексика президенти 10 километрлик масофани югуриб ўтиш учун 50 дақиқа 50 сония вақт сарфлади. У билан бирга ҳукуматнинг бир қатор аъзолари, хусусан, соғлиқни сақлаш вазири Мерседес Хуан Лопес, шунингдек, президент матбуот котиби Эдуардо Санчес ҳам югуришга чиқди.
«Мазкур югуришда иштирок этганимдан жуда мамнунман», — деди 49 ёшли президент. «Тиббиёт нуқтаи назаридан қараганда, икки ойча аввал операция қилинган инсоннинг белгиланган масофани босиб ўтгани таҳсинга лойиқ», — дея қўшимча қилди соғлиқни сақлаш вазири.
Мексика президенти июнь ойи охирида ўт пуфагини олдириб ташлаш бўйича жарроҳлик амалиётини бошдан ўтказганди. Қайта тикланиш жараёни тез кечди ва у бир неча кундан сўнг президентлик ишини бажаришга киришди. Эслатиб ўтамиз, Энрике Пенья Ньето 2012 йили олти йил муддатга Мексика президенти этиб сайланган.
Изоҳ (0)