Гондураснинг кўзи ожиз спортчилари делегацияси Гватемалада қуролли қароқчилик нишонига айланди. Бу ҳақда «ТАСС» хабар бермоқда.
Маълум бўлишича, Гватемала пойтахтидаги шоҳ кўчаларнинг бирида ичида 13 нафар гондураслик спортчи ва уларни кузатиб кетаётган икки киши бўлган автобусга ҳужум уюштирилган.
Полициячилар либосини кийиб олган жиноятчилар автобусни тўхтатиб, Гондурас делегацияси аъзоларининг пуллари, спорт кийимлари ва қимматбаҳо буюмларини тортиб олган. Ҳодиса натижасида автобусда бўлган бир қиз тан жароҳати олган.
Гватемала ҳуқуқни муҳофаза қилиш идоралари ходимлари жиноятчиларни излашга киришган. Қайд этишларича, гондураслик спортчилар Гватемалада 14 август куни старт олган кўзи ожизларнинг 30-спорт ўйинларида иштирок этиш учун келганди.
Халқаро ташкилотларнинг маълумотларига кўра, Гватемала жаҳоннинг энг хавфли мамлакатларидан бири ҳисобланади. БМТ ҳисоб-китобларига кўра, 16 миллион киши истиқомат қиладиган мазкур мамлакатда 2014 йили 6 минг киши ўлдириб кетилган.
Изоҳ (0)