Хитойнинг Уланчаб шаҳрида бокс бўйича хотин-қизлар ўртасида ўтказилган Осиё чемпионати ниҳоясига етди, деб хабар беради Ўзбекистон Миллий олимпия қўмитаси матбуот хизмати.
Қитъанинг етакчи чарм қўлқоп усталари иштирокида бўлиб ўтган мазкур мусобақада Ўзбекистон терма жамоаси аъзолари 2 та кумуш ва 2 та бронза медалига сазовор бўлди.
Ўзбекистон терма жамоаси ҳисобига кумуш медалларни Шаҳноза Низомова (-69 кг) ва Гўзал Исматова (+81 кг) келтирган бўлса, Ёдгорой Мирзаева (-57 кг) ҳамда Дилнавоз Норхўжаева (-81 кг) бронза медалларига сазовор бўлди.
Шу ўринда таъкидлаш жоизки, Ўзбекистон аёллар бокси тарихида шу кунга қадар ҳеч бир спортчи Осиё чемпионатида совринли ўринни қўлга киритмаган эди. Раҳматжон Рўзиохунов бошчилигида Чин мамлакатига йўл олган терма жамоа аъзоларининг бир йўла тўрт нафарининг совриндорлар сафидан ўрин эгаллаши чинданда таҳсинга лойиқ.
Терма жамоа аъзолари 16 август куни Тошкент вақти билан соат 23:30 да Ўзбекистонга қайтиб келади.
Изоҳ (0)