Қарши тумани Мирмирон қишлоғида яшовчи шахс анча йиллардан буён Россия Федерациясида ишлаб, ўша ерда ўзига таниш-билишлар орттирганди. Иш берувчилар унга ишониб, ишчиларни назорат қилиб юриш ва ишчи ёллашга рухсат берганди, деб ёзади «Ҳуқуқ» газетаси.
У Россия пойтахти Москвага ишлашга борган Қарши туманида яшовчи икки йигитни Химки туманидаги қурилишда ишлашга ундай бошлади. Кунига 1000 Россия рубли иш ҳақи ва уч маҳал иссиқ овқат билан таъминлаш тўғрисидаги таклиф йигитларни унга эргашишга мажбур этди. У рўйхатга қўйиш баҳонаси билан йигитларнинг фуқаролик паспортларини олиб, ишни тақсимлаб берди.
Нашр қайд этишича, шарт-шароитлар ваъда қилинганидек бўлмаса-да, улар яхши маош умидида ишни давом эттираверган. Аммо икки ойдан сўнг ҳам маош олмаган. Бу орада унинг алдовларига ишониб Қарши туманида яшовчи яна беш киши қурилишга келиб иш бошлади. Уларга ҳам кунига 1000 рублдан иш ҳақи ваъда қилиб, фуқаролик паспортларини олиб қўйди.
Йигитлар бошқа ишга кетишини айтиб, иш ҳақи ва паспортини сўраганда, бундан бош тортган. Чунки унинг мақсади йигитларнинг иш ҳақларини ўзлаштириб, осон даромад топиш эди. У ана шу мақсадда тумандошларининг 16 970 000 сўм пулини ўзлаштириб юборди.
«Ҳуқуқ» газетаси ёзишича, Жиноят ишлари бўйича Қарши туман суди томонидан Мирмирон қишлоғида туғилган шахсга 6 йил муддатга озодликдан маҳрум қилиш жазоси тайинланди. Бироқ унинг жазо муддати Ўзбекистон Республикаси Олий Мажлиси Сенатининг амнистия тўғрисидаги қарори билан учдан бир қисмга қисқартирилди. Суд шунингдек, жабрланувчиларга етказилган моддий зарарларни ундириш тўғрисида ҳам ҳукм чиқарди.
Изоҳ (0)