Тошкент шаҳрининг Юнусобод туманида Ўзбекистон мустақиллигининг 24 йиллиги ҳамда Кексаларни эъзозлаш йилига бағишлаб миллий таомлар тайёрлаш бўйича танлов ўтказилди. Унда тумандаги маҳаллаларнинг ёши улуғ ошпазлари пазандалик маҳоратини намойиш этди, деб хабар қилади ЎзА.
– Шу кунларда барча маҳаллаларда «Бетакроримсан, ягонасан, она Ватаним – Ўзбекистоним!» шиори остида маданий-маърифий тадбирлар ўтказилмоқда, – дейди «Маҳалла» хайрия жамоат фонди туман бўлинмаси мутахассиси Гулмира Шорустамова. – «Кексалари эъзозланган юрт», «Пазанда бувижон ва билимли буважонлар», «Оилаларда бувижонлар ўгити» каби лойиҳалар, айниқса, кўпчиликда қизиқиш уйғотмоқда. Бундай тадбирлар юртдошларимизни ёши улуғ инсонларга эҳтиром кўрсатиш, бугунги тинч-осуда, фаровон ҳаётимизга шукроналик туйғуси билан яшашга ундамоқда.
Тадбирда фахрийлар мустақиллик, тинчлик халқнинг энг катта бойлиги экани, унинг қадрига етиш зарурлиги ҳақида ўз ҳаёт тажрибалари мисолида сўзлаб берди. Узоқ йиллар ёш авлодга таълим-тарбия бериб, айни кунда ҳам маҳалла ишларида фаол қатнашаётган нуронийлар рағбатлантирилди.
Танловда пазанда нуронийлар турли номинациялар бўйича тақдирланди.
Изоҳ (0)