Лила Мэй Шоу — ҳаётдан хурсанд беш ёшли қизалоқлардан бири, бироқ у ўз тенгдошларидан фарқ қилади, деб ёзади «Adme.ru».
Гап шундаки, гўдак уч йилдан бери саратон ўсимтасига қарши курашиб келади. Афсуски, бу муваффақиятсиз кураш. Яқинда қизалоқнинг, катта эҳтимол билан, ҳаётидаги сўнгги туғилган куни бўлиб ўтди ва унинг ота-онаси бу кунни байрамга айлантирди.
Шифокорларнинг сўзларига кўра, қизчанинг кучсиз организми кимёвий йўл билан даволашга ортиқ бардош бера олмайди, Лила Мэй узоғи билан Шукроналик кунига қадар яшаши мумкин.
Ота-она ўз қизининг сўнгги таваллуд кунини ёддан чиқмас воқеага айлантириш мақсадида Facebook’да махсус гуруҳ ташкил қилиб, бу ерда ўз кечмишини ҳикоя қилди.
Райан ва Ҳайдига маҳаллий ишбилармонлар, кўнгиллилар ва шунчаки бу ҳолатга бефарқ бўлмаган инсонлар ёрдам қўлини чўзди. 31 июль куни ажойиб оқшом ташкил этилди.
Қизалоқ ҳеч қачон битирув оқшоми ёки тўйда иштирок эта олмаслиги сабаб, бу байрам барча муҳим тадбирларни ўзида бирлаштирди.
Барча харажатлар мамлакатнинг турли бурчакларидан юборилган хайрия пуллари ҳисобига қопланди.
Байрамда Лила Кулойим (Золушка) бўлди, унинг атрофида эса Disney студияси фильмларининг қолган маликалари парвона бўлди.
Байрамда, қизалоқ ўз ҳаётида ҳеч қачон кўрмайдиган ҳолатларни ҳис қилиши учун, Райан қизининг «қўлини сўради» ва у билан ҳақиқий тўй рақсига тушди.
«Кўплаб одамларнинг кўмагисиз биз унинг саломатлиги учун бу қадар узоқ кураша олмасдик ҳамда бу байрамни уюштира олмасдик. Ҳаммага раҳмат! Буларнинг бари бир қизчанинг табассуми учун амалга оширилди», — деди Райан.
Ва қизалоқ табассум қилди.
Изоҳ (0)