Жанубий Кореянинг Сувон шаҳрида якунланган шахмат бўйича 18 ёшгача ўғил-қизлар ўртасидаги Осиё чемпионатида ўзбекистонлик шахматчилар муносиб иштирок этди, деб хабар қилади ЎзА.
Нуфузли мусобақанинг ўн ёшгача бўлган ўғил болалар ўртасидаги баҳсларида Жавоҳир Синдоров тўққиз имкониятдан 8,5 очко жамғариб, олтин медалга сазовор бўлди. Эътиборлиси, Жавоҳир саккизинчи турдаёқ чемпионликни ўз фойдасига ҳал қилиб бўлган эди.
Ўзбекистон терма жамоасига Осиё чемпионати бронза медалини ўн тўрт ёшгача бўлган ўғил болалар ўртасидаги баҳсларда қатнашган Нодирбек Ёқуббоев келтирди. У тўққиз партиянинг олтитасида ғалаба қозониб, иккитасида дуранг натижа қайд этди ва 7 очко билан учинчи ўринни эгаллади.
Осиё чемпионати доирасида ўтказилган рапид ва блиц шахмат бўйича World Youth Mind Sports Fair турнирида ҳам ўзбекистонлик ёш спортчилар муваффақиятли иштирок этди.
Рапид шахмат бўйича ўн ёшгача ўғил болалар ўртасидаги баҳсларда ҳам Жавоҳир Синдоровга тенг келадигани топилмади. У етти партиянинг бештасида ғалаба қозонди ва иккита дуранг ўйнади. Шу тариқа, етти имкониятдан 6 очко тўплаб, шоҳсупанинг энг юқори поғонасига кўтарилди.
Жавоҳирнинг укаси Исломбек Синдоров ҳам Жанубий Кореядан медалсиз қайтмади. Исломбек World Youth Mind Sports Fair турнирининг рапид йўналиши бўйича саккиз ёшгача ўғил болалар ўртасидаги баҳсларида етти имкониятдан 6,5 очко жамғариб, олтин медални қўлга киритди.
Ўн олти ёшгача қизлар ўртасидаги рапид йўналиши бўйича ўтказилган баҳсларда Нилуфар Ёқуббоева етти имкониятдан беш очко жамғарган ҳолда бронза медаль билан тақдирланди.
Изоҳ (0)