Айни вақтда Ўзбекистоннинг ягона темир йўл тизимини яратишнинг навбатдаги босқичи сифатида яна бир йирик иншоот – Ангрен—Поп янги электрлаштирилган темир йўл қурилиши жадал давом эттирилмоқда, деб ёзади ЎзА.
Мазкур темир йўл линияси қурилишини амалга ошириш мақсадида жорий йилнинг ўтган даврида 186,7 миллион доллар ўзлаштирилди. Бугунги кунгача 285 та сув ва 6 та йўл ўтказгич, 13 темир йўл кўприги, «Орзу» вокзали, «Кўл», «Темирйўлобод», «Қўшминор» станциялари қуриб битказилди. Бунёдкорлик ишларида 4 минг 250 дан ортиқ мутахассис, 720 дан ортиқ техника воситалари кучидан унумли фойдаланилаётир.
Қамчиқ довонида хитойлик ҳамкорлар томонидан 19,1 километрлик туннелни қуриш ишлари жадал давом эттирилмоқда. Асосий туннелда шу кунгача қарийб 13 километр, қўшимча туннелда 14 километр қазиш ишлари бажарилди. Туннелнинг 8 минг 600 метрлик қисмида пардозлаш ишлари амалга оширилди.
«Ўзбекистон темир йўллари» акциядорлик жамияти матбуот хизматининг хабарига кўра, ушбу туннель жаҳон рейтингида тоғли ҳудудларда жойлашган туннеллар орасида 8-ўринда, туннелдаги темир йўл полотноси узунлиги бўйича эса 13-ўринда туради.
Ушбу темир йўл тармоғининг ишга туширилиши Фарғона водийсини Ўзбекистоннинг марказий қисми билан боғлаш имконини яратади. Шу билан бирга, Ўзбекистон ҳудуди бўйлаб ягона темир йўл тизимини шакллантириш ишлари якунига етказилиб, Хитой – Марказий Осиё – Европа янги халқаро транзит темир йўл коридорининг муҳим бўғини бўлиб хизмат қилади.
Изоҳ (0)