Лиза Бардек: Ҳиллари Клинтон буткул соғлом ва президентлик вазифаларини бажаришга қодир

АҚШ собиқ давлат котиби Ҳиллари Клинтоннинг соғлиғи жойида ва президентлик вазифаларини бажаришга қурби етади. Бу ҳақда 31 июль, жума куни келгуси йилда бўлиб ўтадиган президентлик сайловларида Демократлар партиясидан асосий номзод саналаётган сиёсатчининг шахсий шифокори Лиза Бардек маълум қилди, дея хабар беради «ТАСС».

Шифокор 67 ёшли Клинтон 2012 йил декабрида, давлат департаментини бошқариб турган пайтда ҳушидан кетиб йиқилганидан кейинги мия чайқалиши асоратларидан 2013 йилдаёқ тўлиқ халос бўлганини таъкидлади.

Шунингдек, Бардекнинг баёноти орқали 1998 ва 2009 йиллари Ҳиллари Клинтонда гипотиреоз (қалқонсимон без фаолиятининг сусайиши), мавсумий аллергия ва томирлар тромбози каби касалликлар қайд этилгани маълум бўлди.