Киану Ривз ўзининг янги «Худонинг қизи» (Daughter of God) фильмини суратга олиш ишлари якунланганига бағишлаб Нью-Йоркдаги клублардан бирида ўтказилган кечага 20 дақиқа кеч қолди ва уни клубга киритишларини ёмғир остида сабр билан кутиб турди, дея хабар бермоқда «Теленеделя».
Ҳақиқат ошкор бўлгач, клуб хўжайини Кианунинг ёмғир остида туриб кутаётганини ҳеч ким билмай қолганини айтди. «У ҳеч кимга ҳеч нарса демади», — дея ўзини оқлади у.
Нашр таъкидлашича, актёр метрода юради, уйсизлар билан мулоқотда бўлиб, уларга ёрдам беради. «Матрица» фильмларидан бирини суратга олиш ишлари тугагач, у барча каскадёрларга кўрсатган маҳоратлари учун биттадан янги «Харлей» мотоцилкини ҳадя қилган эди. Бундан ташқари, «Матрица» костюмерлари ва махсус эффектларни яратувчи компьютерчиларни етарлича маош билан таъминлаш учун гонорарининг катта қисмидан воз кечган эди (актёр уларнинг фильмдаги иштироки етарлича баҳоланмаган, деб ҳисоблаган).
«Иблис адвокати» фильми съёмкасида эса, Аль Пачинони фильмга таклиф қилишга пул етиши учун ўз гонорарини камайтирган.
Киану Ривз ҳаётининг бир босқичида кетма-кет бахтсизликларга дуч келган: энг яхши дўсти ҳалок бўлган, севган қизи фарзандидан айрилган ва кўп ўтмай ўзи автоҳалокатда нобуд бўлган, опаси эса лейкемияга чалинган. Бироқ актёр ўзини йўқотиб қўймади: у опасини даволаётган касалхонага 5 миллион доллар хайрия қилди, съёмкалардан воз кечиб (опасининг ёнида бўлиш учун), лейкемия билан курашиш жамғармасини тузди. Ҳар бир фильмидан олган даромадидан у ушбу жамғармага хайрия қилади.
Изоҳ (0)