Британиялик ҳажвчи ва актёр Рассел Брэнднинг Facebook’да қолдирган пости ижтимоий тармоқ фойдаланувчиларнинг ғазабини келтирди. “Nur.kz”нинг хабар беришича, мазкур хабарда у қиролича Елизавета II ни «Братвурст-Краут-Наци хоним» деб чақиришни таклиф қилди.
«Қиролича худди бургут ё тоғ сингари буюкмидики, биз уни «Ҳазрати олиялари» деб чақирсак? У шунчаки одам. Шляпа кийган кичик хоним ва унинг пулини биз тўлаб қўйганмиз», — деб ёзди Брэнд. Шундан сўнг қироличани аслида қандай чақириш мақбул эканлиги ҳақидаги фикрлари билан ўртоқлашди.
«Биз уни миссис Виндзор деб чақиришимиз керак. Ҳатто шу ҳам унинг ҳақиқий исми эмас. Аслида унинг исми миссис Сакс-Кобург-Гота», — дея, актёр Британия тахти ҳукмрон сулоласининг аждодлари немислар эканлигига ишора қилди. «Фамилияни ўзгартирганликларига ҳайрон қолмаса ҳам бўлади — бу мен эшитган жаҳондаги энг немисча исмдир. Яна қироличани миссис Братвурст-Краут-Наци деб чақириш ҳам мумкин», — дея қўшимча қилди Брэнд.
Facebook’нинг аксарият фойдаланувчилари Брэнднинг хабарини нафақат Елизавета II учун, балки барча немислар учун ҳақоратли, деб ҳисобламоқда. Бундан ташқари, ҳажвчи актёрни иккиюзламачиликда айблаганлар ҳам топилди — уларнинг фикрича, актёрнинг ўзи ҳам сердаромадлиги билан ҳукмрон тоифага мансубдир.
Изоҳ (0)