Honda тежамкорлик бўйича жаҳон рекордини ўрнатди
Honda компанияси енгил автомобилда ҳаракатланишдаги тежамкорлик бўйича Гиннеснинг рекордлар китобига кирди, деб хабар бермоқда «Motor.ru».
Натижа 1,6 литрли двигателга эга, дизель ёқилғисида ҳаракатланувчи Civic Tourer моделида амалга оширилди. Машинани навбати билан Honda’нинг Европадаги илмий тадқиқот марказининг икки мутахассиси — Фергал МакГрат ва Жулиан Уоррен бошқариб борди.
Сафар 1 июнь куни Бельгиянинг Алст шаҳарчасида бошланиб, 25 июнь куни худди шу ерда якунланди. Бу вақт давомида деярли 18 йил бирга ишлаган ҳамкасблар Европа иттифоқининг 24 давлати ҳудудида 13 498 километр масофани босиб ўтди.
Сафар давомида 100 километрга ўртача 2,82 литр ёқилғи сарфланган — автомобиль ҳужжатларида келтирилганидан 25 фоизга камдир (аралаш режимда 3,8 литр). Рекорд тўлиқ серияли чиқарилган оддий автомобилда ўрнатилган.
