Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссиясининг йиғилиши бўлиб ўтди, дея хабар бермоқда ЎзА.
Эълон қилинган танловлардан бири «Кексаларни эъзозлаш йили» Давлат дастурида белгиланган вазифаларни амалга оширишга нодавлат нотижорат ташкилотларини кенг жалб этишга оид бўлиб, унда 210 нодавлат нотижорат ташкилоти, оммавий ахборот воситаси, фуқаролик жамиятининг бошқа институтлари иштирок этди. Парламент комиссияси томонидан энг мақбул деб топилган 70 дан ортиқ лойиҳани молиялаштириш кўзда тутилмоқда. Шу мақсадлар учун 1 миллиард 100 миллион сўм миқдорида маблағ ажратилди.
Иккинчи танлов «Давлат ижтимоий дастурларининг амалга оширилиши, демократик ислоҳотларни чуқурлаштириш ва фуқаролик жамиятини шакллантириш жараёнларини мустақил оммавий ахборот воситаларида ёритишга қаратилган лойиҳаларни қўллаб-қувватлаш» мавзусида бўлиб, унда 87 нодавлат нотижорат ташкилоти ва фуқаролик жамиятининг бошқа институтлари ўз лойиҳалари билан иштирок этди.
Йиғилиш иштирокчилари томонидан мазкур танлов натижалари таҳлил этилди. Парламент комиссияси аъзолари иштирокида жойларда ўтказилган минтақавий семинарлар сарҳисоби, давлат гранти асосидаги танловлар якунлари ҳамда навбатдаги танловларни эълон қилиш, 2014 йилда ажратилган давлат субсидиялари маблағларининг мақсадли фойдаланилганлиги юзасидан олиб борилган мониторинг натижалари атрофлича муҳокама этилди.
Изоҳ (0)