Ўзбек Миллий академик драма театрида Ўзбекистон мустақиллигининг 24 йиллигига бағишлаб Ўзбекистон Республикаси Маданият ва спорт ишлари вазирлиги, «Ўзбектеатр» ижодий-ишлаб чиқариш бирлашмаси, Театр ижодкорлари уюшмаси ҳамкорлигида ўтказилган Ўзбекистон театрларининг «Сени куйлаймиз, замондош!» III республика кўрик-фестивали ғолиб ва совриндорларини тақдирлашга бағишланган тадбир бўлиб ўтди, деб хабар беради ЎзА.
Беш кун давом этган фестиваль жараёнида янги саҳна асарлари театр санъати мухлислари эътиборига ҳавола этилди. Уларнинг постановка жараёни, актёрларнинг ижро услуби, режиссёр маҳорати театршунослар, олимлар, драматурглар, ёзувчи ва шоирлардан иборат нуфузли ҳакамлар ҳайъати томонидан муҳокама этилди. Кўрик-фестиваль доирасида ўтказилган «Саҳнада замондош образи» мавзусидаги илмий-амалий конференцияда давр билан ҳамнафас яшаётган, фидойи инсонлар сиймосини саҳнага олиб чиқишнинг долзарб масалалари, истиқболдаги вазифалар атрофлича муҳокама этилди.
Қашқадарё вилояти мусиқали драма театрининг «Орол бобо» спектакли биринчи ўринга сазовор бўлди. Иккинчи ўрин Бухоро вилояти мусиқали драма театрининг «Бурч» спектаклига берилди. Қорақалпоғистон давлат ёш томошабинлар театрининг «Томир» ҳамда Муқимий номидаги ўзбек давлат мусиқали театрининг «Қувонч» спектакли учинчи ўринга лойиқ топилди.
Ғолиб ва совриндорларга диплом ва совғалар топширилди.
Изоҳ (0)