Навоий вилоятининг Зарафшон шаҳрида «Камалак» замонавий аква боғи фойдаланишга топширилди, деб хабар бермоқда Ўзбекистон Миллий ахборот агентлиги.
Шу муносабат билан ўтказилган тадбирда Президентимиз раҳнамолигида ёшларнинг ҳеч кимдан кам бўлмаган шароитларда ўсиб-улғайиши, истеъдод ва салоҳиятини намойиш этиши учун барча имконият яратилаётгани алоҳида таъкидланди. Хусусан, ҳудудларда замонавий маданият масканлари ва истироҳат боғларининг барпо этилаётгани, аҳоли, айниқса, болажонларнинг мириқиб ҳордиқ чиқаришида муҳим омил бўлаётир.
– Қарийб 3 миллиард сўм маблағ эвазига бунёд бўлган мазкур боғни саҳродаги мўъжизага қиёс қилиш мумкин, – дейди Навоий кон-металлургия комбинати марказий кон бошқармаси директори ўринбосари Илҳом Шарипов. – Комбинатнинг Зарафшон қурилиш бошқармаси томонидан барпо этилган боғнинг майдони 1,3 гектарни ташкил этади. Ҳудуд манзарасини янада баҳаво қилиш учун 21 минг туп анвойи гул ҳамда 1000 га яқин манзарали дарахт кўчати ўтқазилди.
Боғ ҳудудидаги 3 чўмилиш ҳавзаси, сузишга мўлжалланган айланма анҳор, турли фавворалар, замонавий аттракционлар болажонлар ихтиёрида. Бу ерга ташриф буюрувчиларнинг саломатлигини муҳофаза қилиш учун тиббий хизмат кўрсатиш хонаси ҳамда музқаймоқ, салқин ичимликлар дўконлари ташкил этилди.
– Набираларим бу ажойиб масканнинг барпо бўлганидан жуда хурсанд, – дейди Шарофат ая Маҳмудова. – Фарзандларимизга муносиб байрам совғаси сифатида иш бошлаган боғдаги шароитларга ҳавасим келмоқда. Буларнинг барчаси юртимизда ҳукм сураётган тинчлик ва осойишталик самарасидир. Келажагимиз ворисларига бундай шароитлар яратиб бераётган Юртбошимиздан беҳад миннатдормиз.
Изоҳ (0)