Алексей Евстафеев мураббийлигидаги Ўзбекистон ўсмирлар терма жамоасида порлаб, ўзбек футболининг келажаги сифатида эътироф этилиб, кейинчалик деярли «йўқ» бўлиб қолган Темур Ҳакимовни мухлислар ҳали унутишмаган бўлса керак. Бугунги кунда биринчи лига вакили Тошкентнинг «Оқ-тепа» жамоасида ўйнаётган ҳужумчи билан суҳбат «Arena.uz» сайтида чоп қилинди.
2011 йилда Мексика майдонларида ўтказилган ўсмирлар ўртасидаги жаҳон чемпионатида Ўзбекистон чорак финалгача етиб борганди. Ўша мусобақада 3 та тўп киритган Ҳакимов Ўзбекистоннинг етакчиларидан бирига айланганди. Футболчи турнирдан сўнг ўзига нима бўлгани ҳақида айтиб берди.
«Буни кўпчилик билади. Ўзим ҳам яширмайман. Бунақа ёшда ўсмир болаларда кескин ўзгаришлар юз беради. Бу характерми ёки бошқами билмайман. Мен билан биринчи марта юз берди. Хуллас, юлдузлик касалига чалиндим. Ҳали ҳеч нарса қилмаган бўлсамда, жуда вақтли ‘юлдуз’ни ушлаб олган эканман! Шундан кейин ҳамма нарса ўзгариб кетди. Лекин ўз вақтида хатоимни тушуниб етдим.
Мексика майдонларидаги, Осиё чемпионатидаги воқеалар, хурсандчиликлар тарихда қолди. Инсон ўша тарихни эслаб юраверса, ўсмайди. Шуни тушуниб етдимки, мен ҳали ҳеч ким эмасман, барчасини бошидан бошлаш керак».
Изоҳ (0)