Андижондаги теннис турнирида Нигина Абдураимова ва Сабина Шарипова 2-босқичга чиқди

Андижон шаҳрида хотин-қиз теннисчилар ўртасидаги турнирнинг биринчи давра учрашувлари давом этмоқда, деб хабар қилади «Olamsport.com».

Мусобақанинг мукофот жамғармаси 25 минг АҚШ долларидан иборат бўлиб, унда ўзбекистонлик теннисчилардан ташқари Испания, Япония, Чехия, Украина, Россия, Сербия, Туркия, Ҳиндистон каби давлатлардан келган истеъдодли теннис маликалари иштирок этмоқда.

Асосий тўр баҳсларида ўзбекистонлик 10 нафар теннисчи иштирок этмоқда. Ўзбекистоннинг биринчи рақамли теннисчиси Нигина Абдураимова Андижон турнирининг иккинчи ракеткаси сифатида қайд этилган бўлиб, 2 июнь куни илк даврада ўзбекистонлик теннисчи Шаҳноза Хотамовани 6:0, 6:2 ҳисобида таслим этди.

Яна бир ўзбекистонлик Сабина Шарипова россиялик Маргарита Лазаревани 6:4, 6:3 ҳисобида енгди. Кутилмаганда Альбина Хабибулина россиялик теннисчи Анна Моргинага 6:3, 4:6, 1:6 ҳисобида имкониятни бой бериб қўйди. Шунингдек, ўзбекистонлик теннисчилардан Сарвиноз Сайидхўжаева, Арина Фольц, Гўзал Юсупова, Полина Меренкова ҳам рақибаларига ютқазиб қўйди.