Хитой Халқ Республикаси ҳарбий қудратни кескин ошириш билан бир қаторда, ядро кучларининг ҳажми ва салоҳиятини ҳам изчил оширишга киришган, дейди АҚШ ҳарбийлари ва қурол назорати бўйича экспертлар. Бу ҳақда Reuters агентлиги ёзди.
Манбага кўра, АҚШ Стратегик қўмондонлиги раҳбари генерал Энтони Котон 2025 йилнинг март ойида Конгрессда Хитой раҳбари Си Цзиньпин 2027 йилга қадар Тайванни эгаллашга тайёр бўлиши кераклиги ҳақидаги кўрсатма берганини билдирган. Шунингдек, у Хитойнинг қуруқликдан, ҳаводан ва денгиздан учирилиши мумкин бўлган ядро қуролларини йиғишни тезлаштираётганини айтган.
Қайд этилишича, Хитой 2023 йилда миллий мудофаа сиёсатидаги “ҳар қандай шароитда ҳам биринчи бўлиб ядро қуролидан фойдаланмаслик” ҳақидаги узоқ йиллик ваъдасини янгилаган. Яъни эндиликда Хитой ядро қуролига эга бўлмаган давлатларга қарши ядро қуролидан фойдаланмаслик ёки таҳдид қилмаслик мажбуриятини олган.
Хитой Мудофаа вазирлиги хавотирларга жавобан: “Ядро урушида ғалаба қозониб бўлмайди ва у ҳеч қачон бошланмаслиги керак. Хитой ўзини мудофаа қилиш ядро стратегиясига амал қилади ва биринчи бўлиб ядро қуролидан фойдаланмаслик сиёсатини юритади”, деган.
Пентагоннинг Хитой ҳарбий қудрати ҳақидаги йиллик ҳисоботида айтилишича, Хитой ядро қуролидан биринчи бўлиб фойдаланишни рад этса-да, унинг стратегияси ядро кучлари, бошқарув ва қўмондонликка таҳдид соладиган ёки ядро зарбаси таъсирига тенглашадиган оддий ҳужумларга жавобан биринчи бўлиб ядро қуролидан фойдаланишни ҳам ўз ичига олиши мумкин.
Пентагон 2024 йил охирида эълон қилинган ҳисоботида ёзилишича, Тайвандаги ҳарбий мағлубият коммунистик режимнинг омон қолишига жиддий таҳдид туғдирса, Пекин ядро қуролидан биринчи бўлиб фойдаланишни ҳам кўриб чиқиши эҳтимолдан холи эмас.
Хитой Мудофаа вазирлиги эса табиийки бундай ҳисоботларга кескин эътироз билдиради. Улар бундай маълумотларни Хитойни обрўсизлантириш ва халқаро ҳамжамиятни чалғитиш учун тўқиб чиқарилган уйдирма деб ҳисоблайди.
Bulletin of the Atomic Scientists маълумотларига кўра, Хитой бошқа барча ядро қуролига эга давлатларга қараганда тезроқ суръатда ўз захирасини кенгайтирмоқда ва тахминан 600 та каллакка эга.
Ташкилот баёнотида айтилишича, Хитой тахминан 350 та янги ракета шахтасини ва бир нечта янги мобил учириш қурилмалари базаларини қурмоқда. Ҳисоб-китобларга кўра, Хитой Халқ Озодлик Армияси қуруқликда тахминан 712 та ракета учиргичга эга, бироқ уларнинг барчаси ядро қуроллари учун мўлжалланмаган. Улардан 462 таси АҚШнинг континентал ҳудудига етиб бориши мумкин бўлган ракеталарни учира олади.
Хитой армияси учиргичларининг кўпи қисқа масофали ракеталар учун мўлжалланган бўлиб, улар минтақавий нишонларга зарба бериш учун ишлатилади. Бироқ кўплаб учиргичлардан ядро ҳужуми учун фойдаланиб бўлмайди.
Пентагоннинг ҳисоб-китобларига кўра, Хитой армияси 2030 йилга келиб 1000 дан ортиқ оператив ядро каллакларига эга бўлади. Чунки улар кичик қувватли аниқ зарба берувчи ракеталардан тортиб, кўп мегатонли портлаш қувватига эга қитъалараро баллистик ракеталар қуришни жадаллик билан тезлаштирмоқда.
Изоҳ (0)