Coca-Cola ichimligi Uzbekiston LTD компаниясининг маълум қилишича, бир қатор савдо нуқталари, дўконлар ва бозорларда 1,5 литрли сохта Coca-Cola ва Fanta ичимликлари сотилаётгани аниқланган, деб ёзади «Кун».
Biznes Daily нашрининг ёзишича, ушбу маҳсулотда шакар ва углерод диоксиди меъёридан кам эканлиги аниқланган. Шунингдек, нашрда сохта ичимликларни ҳақиқийларидан фарқлаб турадиган белгилар ҳақида маълумот берилди.
«Албатта, ҳуқуқ-тартибот идоралари, солиқ инспексияси ходимлари жойларда ноқонуний иш билан шуғулланаётганларни аниқлаш бўйича тадбирлар олиб бормоқда, уларни қонунга мувофиқ жазога тортмоқда. Аммо ушбу ҳолатни тўла бартараф этиш учун биринчи навбатда истеъмолчиларнинг ўзлари ҳушёр бўлишлари талаб этилади. Улар харид қилинаётган маҳсулотнинг сифатига алоҳида эътибор беришлари керак», — дейилада мақолада.
Жумладан, сохта ичимликларни ҳақиқийларидан қуйидаги белгиларга кўра фарқлаш мумкинлиги маълум қилинди:
- биринчидан, сохта маҳсулотлар қадоқланадиган термоплёнка Coca-Cola Ichimligi Uzbekiston LTD томонидан қабул қилинган стандартлардан фарқ қилади;
- иккинчидан, ёрлиқлардаги кодларга эътибор бериш талаб қилинади – битта қадоқдаги 6 та идишда кўрсатилган кодлар айнан бир хил бўлиши керак, агарда бу кодларда турли саналар ва ишлаб чиқариш жойлари кўрсатилган бўлса, билингки, ичимлик эски идишларга қуйилган бўлади;
- ниҳоят, идиш қопқоғининг назорат ҳалқаси асосий қисмдан ажралмаган бўлиши, шунингдек, унда қайта пайвандлаш излари бўлмаслиги керак.
Энг муҳими эса, сохта ичимлик эски идиш ичига қуйилади. Идишни диққат билан кўздан кечирганда эса унинг янги ёки эскилигини аниқласа бўлади.
Изоҳ (0)