Ўзбекистоннинг тарихий объектларида Wi-Fi тармоғи ташкил этилади

«Ўзбектелеком» акциядорлик компанияси Ўзбекистон Республикаси тарихий ва маданий мероси ҳудудларида, шунингдек, жамоат учун мўлжалланган ҳамда фаол туристик объектларида симсиз абонент радиоуланиш тармоғини ташкил этиш бўйича лойиҳасини тақдим этди. Бу ҳақда Infocom.uz хабар берди.

«Ўзбектелеком» АК Wi-Fi тармоғининг қулайлиги шундаки, фойдаланувчилар бир карта ёрдамида «Ўзбектелеком» АК тармоғида мавжуд бўлган барча объектларда Интернет хизматидан фойдалана олади. Агар абонент, масалан, картани Хива шаҳрида сотиб олган бўлса, ундан Термиз шаҳрида ҳам, Қарши ва Шаҳрисабз, шунингдек, «Ўзбектелеком» АК Wi-Fi тармоғи қоплаш зонасининг бошқа жойларида ҳам фойдаланиши мумкин.

Ҳозирги вақтда «Ўзбектелеком» АК Wi-Fi тармоғи қоплаш зонаси ўзида 27 та объектни жамлаган:

Хоразм вилояти: «Ичан Қалъа» музейи, Урганч шаҳри аэропорти, Урганч шаҳри марказий темир йўл вокзали;

Қашқадарё вилояти: Қарши шаҳри аэропорти ва темир йўл вокзали, «Абдулазиз» мадрасаси, «Ал Жарроҳ» мажмуаси, Қарши шаҳар ўлкашунослик музейи, «Шаҳрисабз» меҳмонхонаси, «Даорус-Саодат» мажмуаси, «Оқсарой» мажмуаси, «Кўк гумбаз» мажмуаси, Амир Темур музейи;

Сурхондарё вилояти: Термиз аэропорти ва темир йўл вокзали, «Меридиан» меҳмонхонаси, «Сурхон» меҳмонхонаси, «Ат-Термизий авлиё ота» тарихий мажмуаси;

Тошкент вилояти: «Чинарас» ресторани, «Хумсон» дам олиш зонаси, «Арчазор» дам олиш зонаси, «Хўжакент» дам олиш зонаси, «Янгиобод Чотқол Марвариди» дам олиш зонаси, «Кумушкон» дам олиш зонаси, «Горняк» НТМК дам олиш зонаси, «Кичик Чимён» дам олиш зонаси, Чимён Осма (Канат)-суянчиқли табиий чегара йўли.

Тариф режаларига мувофиқ Интернет тармоғига уланишнинг энг паст тезлиги 4 Мбит/с ни ташкил этади. Фойдаланувчиларга беш турдаги 4500 дан 25000 сўмгача номиналли, киритилган трафиги 150 дан 2500 Мбайтгача ҳажмли карточкалар тақдим этилади. Интернет тармоғи трафиги ва «Tas-IX» киритилган трафик ҳажмига киради. Карточканинг фаоллаштирилганидан кейин амал қилиш муддати 30 кунни ташкил этади.

Компания режаларида Wi-Fi тармоғини бутун Ўзбекистон ҳудуди бўйлаб кенгайтириш белгиланган.