Вашингтондаги Пью тадқиқот маркази ходимлари ҳозирда сон жиҳатидан дунёда энг кўпчилик бўлган христианларга 2050 йилда мусулмонлар деярли етиб олишини ҳисоблаб чиқди, деб хабар бермоқда ТАСС. 2070 йилга бориб эса мусулмонлар кўпчиликни ташкил этади.
Ҳисоботга кўра, 2010 йилда христианларнинг умумий сони 2,2 миллиард киши бўлган, бу дунё аҳолисининг 31 фоизи демакдир. 1,6 миллиард мусулмон эса жаҳон аҳолисининг 23 фоизини ташкил этган.
Бироқ мусулмонлар энг кўп ошиб бораётган аҳоли тоифаси ҳисобланади. 2050 йилга бориб уларнинг умумий сони ҳозиргидан 73 фоизга, христианларники эса 35 фоизга ошади. Натижада 9,3 миллиардлик дунё аҳолисидан 2,8 миллиарди мусулмонлар, 2,9 миллиарди христианлар бўлади. Христианларнинг 40 фоизи Африкада, Саҳройи Кабирдан жанубда яшайди.
Европада мусулмонлар аҳолининг 10 фоиздан ортиғини ташкил этади. Буюк Британия, Франция ва Нидерландия каби давлатларда христианлар кўпчилик бўлмай қолади. АҚШда ислом христианликдан кейин иккинчи ўринга чиқади, яъни яҳудийликдан ўтиб кетади. Америкада христианлар аҳолининг 3/4 қисмини эмас, 2/3 қисмини ташкил эта бошлайди.
Тадқиқотчилар буддавийларнинг сони ошмаслигини тахмин қилмоқда. Буддавийларда ҳар бир аёлга 1,6 бола тўғри келса, мусулмонларда бу кўрсаткич 3,1 га, христианларда эса 2,7 га тенг бўлади. Қизиқарли томони, дунё бўйлаб атеистлар, агностиклар ва ўзини ҳеч қандай динга мансуб эмас деб ҳисобловчилар сони камаяди.
Изоҳ (0)