Тожикистон Республикаси Президенти Эмомали Раҳман Ислом Каримовни Ўзбекистон Президентлигига қайта сайлангани муносабати билан табриклаб, телеграмма жўнатди. Бу ҳақда Тожикистон Президенти матбуот хизмати хабар бермоқда.
«Қайта сайланишингиз Сизнинг узоқни кўзлаган раҳбарлигингиз остида олиб борилаётган ва Ўзбекистонни ҳар томонлама ривожлантириш, унинг салоҳиятини мустаҳкамлаш ва халқ фаровонлигини оширишга қаратилган сиёсатга юксак ишонч борлигидан далолатдир.
Минтақада хавфсизлик ва барқарорликни таъминлашнинг муҳим омили бўлган ҳамда давлатларимиз ва халқларимизнинг туб манфаатларига жавоб берувчи Тожикистон ва Ўзбекистон ўртасидаги дўстлик ва яхши қўшничилик муносабатларининг олдинда турган даври самарали ҳамкорликнинг янги намуналари билан бойишига аминмиз», − дейилади табрик телеграммасида.
Эслатиб ўтамиз, Марказий сайлов комиссияси томонидан эълон қилинган Ўзбекистон Президенти сайловининг дастлабки натижаларига биноан Ислом Каримовга сайловчиларнинг 90,39 фоизи овоз бергани маълум бўлди.
Аввалроқ, Ислом Каримовни Ўзбекистон Президенти сайловидаги ғалаба билан Россия Президенти Владимир Путин, Қозоғистон Президенти Нурсултон Назарбоев ва Хитой Халқ Республикаси Раиси Си Цзиньпин табриклагани хабар берилган эди.
Изоҳ (0)