Ўзбекистон Республикаси Президенти сайловида овоз бериш жараёни давом этмоқда. Тошкент вақти билан соат 17.00 га қадар сайловда 17 миллион 728 минг нафардан зиёд фуқаро иштирок этди. Бу сайловчилар умумий сонининг 85,2 фоизини ташкил этади. Ўзбекистон Республикаси Президенти сайловини ёритиш бўйича Республика матбуот марказида халқаро кузатувчилар, мамлакатимиз ва хорижий оммавий ахборот воситалари вакиллари учун ўтказилган брифингда шу ҳақда маълум қилинди, деб ёзади Марказий сайлов комиссияси расмий сайти.
Марказий сайлов комиссияси раиси М.Абдусаломов Ўзбекистон Республикасининг Япония, Корея Республикаси, Малайзия, Сингапур, Хитой, Индонезия ва Таиланддаги ваколатхоналари ҳузурида ташкил этилган сайлов участкаларида овоз бериш жараёни якунланганини маълум қилди.
Мамлакатимизнинг Афғонистон, Озарбайжон, Бирлашган Араб Амирликлари, Эрон, Қувайт, Саудия Арабистони, Миср, Покистон, Ҳиндистон, шунингдек, Европа ва қўшни давлатлардаги ваколатхоналарида ташкил этилган сайлов участкаларида овоз бериш жараёни давом этмоқда.
Ўзбекистон Республикасининг Америка Қўшма Штатларидаги ваколатхоналари ҳузурида ташкил этилган сайлов участкалари ҳам очилди. Сайлов Ўзбекистон Республикаси Конституцияси, «Ўзбекистон Республикаси Президенти сайлови тўғрисида»ги ва бошқа қонунларда мустаҳкамланган демократик принципларга мувофиқ равишда ўтмоқда. Айни пайтгача Марказий сайлов комиссиясига сайлов қонунчилиги бузилиши ҳақида хабар келиб тушмади. Овоз беришнинг якунларига бағишланган навбатдаги брифинг Тошкент вақти билан соат 22.00 да ўтказилади.
Изоҳ (0)