МДҲ ижроия қўмитаси раиси – Ижрочи котиби Сергей Лебедев Ўзбекистонда ўтказилаётган сайлов умумэътироф этилган халқаро стандартларга тўла мос келишини айтди, деб ёзади ЎзА.
«Миссиямиз таркибига Мустақил давлатлар ҳамдўстлигидан 72 вакил киритилган. Ушбу гуруҳ раҳбари сифатида Тошкент ва Жиззах вилоятларидаги сайлов участкаларини кузатар эканман, сайловга ҳар томонлама пухта тайёргарлик кўрилганига гувоҳ бўлдим. Бу сайлов ташкилий жиҳатдан юксак савияда ўтишини англатади. Ким билан суҳбатда бўлмайлик, барча фуқаролар мамлакатда ҳукм сураётган тинчлик, барқарорлик ва тараққиёт бардавом бўлиши учун овоз беришини билдирди. Дарҳақиқат, Ўзбекистон барқарор тараққиёт ва ривожланиш йўлидан бормоқда. Барча шаҳару қишлоқлар обод ва гўзал. Айниқса, Жиззахда рўй берган ўзгариш ва янгиланишларни кўриб қувондим. Шаҳар жуда ўзгариб кетибди. Миссиямиз вакиллари бундай ўзгаришлардан ғоят мамнун», — деди Лебедев.
Унинг сўзларига кўра, сайлов комиссиялари тизими томонидан амалга оширилган кенг кўламли тайёргарлик ишлари овоз беришнинг юксак савияда ўтаётганида ҳам кўриниб турибди. «Сайловчилар жуда фаол, айниқса, ёшлар. Бир сўз билан айтганда, сайлов демократик тамойиллар асосида ўтмоқда», — дея қўшимча қилди МДҲ ижроия қўмитаси раиси.
Изоҳ (0)