МДҲ ва Шарқий Европа мамлакатлари институти директори, Сайлов тизимларини ўрганиш бўйича халқаро марказ президенти Александр Синкер Ўзбекистон Республикаси Президенти сайловига ҳар томонлама пухта тайёргарлик кўрилганини қайд этди. Бу ҳақда Ўзбекистон Республикаси Марказий сайлов қўмитасининг расмий сайтида хабар берилди.
«Сайлов тизимининг замон талаблари асосида шакллангани, бу борада халқаро нормаларга жавоб берадиган қонунлар ишлаб чиқилиб, ҳаётга жорий этилаётгани мамлакатингизнинг улкан ютуғидир. Сайловчиларнинг эркин, яширин овоз бериши учун барча шароит яратилган. Буни мен Тошкент шаҳридаги бир қанча сайлов участкалари мисолида кўрдим.
Яна бир жиҳат эътиборимни тортди: сайлов участкасига келиш имконига эга бўлмаган кишиларнинг уйига махсус кўчма қутилар олиб борилар экан. Бу халқингизга хос инсонпарварлик ва бағрикенглик, сайлов тизимидаги тенгликнинг яна бир ифодасидир.
Ўзбекистонда ёш авлод тарбиясига қаратилаётган эътибор таҳсинга лойиқ. Мамлакатингизнинг ёшларга оид давлат сиёсати бошқалар учун намуна бўлиб хизмат қилиши мумкин. Ёшларнинг кексаларга кўрсатаётган ҳурмат ва эҳтиромидан ҳайратландим. Одамларнинг бир-бирига гўзал муомаласини кўриб, халқингизнинг маданиятига ҳавас қилдим.
Тошкент, Самарқанд, Бухоро каби қадимий шаҳарлардаги меъморий обидаларни зиёрат қилиш бахтига муяссар бўлганман. Мамлакатингизда аждодларингизнинг бой меросини ўрганиш, тарғиб қилиш, маданий ёдгорликларни таъмирлаш ва асраб-авайлаш, шаҳар ва қишлоқлар инфратузилмасини ривожлантириш борасида амалга оширилаётган кенг кўламли ислоҳотлар ўз самараларини бермоқда».