Ўзбекистон Президенти сайловида овоз берган сайловчилар сони 71,6 фоиздан ошди

Ўзбекистон Республикаси Марказий сайлов комиссияси раиси М.Абдусаломов Ўзбекистон Республикаси Президенти сайловида овоз беришнинг боришига бағишланган брифингда сўзга чиқиб, сайлов билан боғлиқ маълумотларни ошкор этди, дея хабар бермоқда Марказий сайлов комиссияси матбуот хизмати.

Унинг сўзларига кўра, бугун соат 6.00 да Ўзбекистон Республикаси Президенти сайловини ўтказувчи 14 та сайлов округидаги сайлов участкаларида овоз бериш жараёни бошланди. Шунингдек мамлакатимизнинг хорижий давлатлардаги ваколатхоналари ҳузурида ташкил этилган 44 та сайлов участкасининг аксарияти ҳам очилиб, овоз бериш бошланди. Айни пайтда Марказий сайлов комиссияси билан округ ва участка сайлов комиссиялари ўртасида доимий алоқа ўрнатилган.

«Биринчи бўлиб овоз бериш Ўзбекистон Республикасининг Япония, Корея Республикаси, Малайзия, Сингапур, Хитой, Индонезия, Таиланд ва Ҳиндистондаги ваколатхоналари ҳузурида ташкил этилган сайлов участкаларида бошланди, — деди М. Абдусаломов. — Марказий сайлов комиссиясига овоз бериш жараёнининг бориши тўғрисидаги маълумотлар он-лайн режимида келиб тушмоқда. Шуни алоҳида таъкидлаш жоизки, Ўзбекистон Республикасининг фуқаролари сайловда юксак сиёсий фаолликни намоён этмоқда».

Комиссия раисининг қайд этишича, ҳозирга қадар сайловчилар рўйхатига киритилган 20 миллион 798 минг 52 кишидан 14 миллион 900 мингдан ортиқ сайловчи овоз беришда иштирок этди. Бу сайловчилар умумий сонининг 71,6 фоизини ташкил этади. Шу пайтга қадар сайловчилар рўйхатига киритилган фуқароларнинг 33 фоизидан ортиғи сайловда иштирок этганини инобатга оладиган бўлсак, «Ўзбекистон Республикаси Президенти сайлови тўғрисида»ги Қонуннинг 35-моддасига асосан сайлов ўтган, деб ҳисобланади.

Президент сайловида Марказий сайлов комиссияси томонидан рўйхатга олинган 5 та халқаро ташкилот – Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси, Мустақил Давлатлар Ҳамдўстлиги, Шанхай ҳамкорлик ташкилоти, Бутунжаҳон сайлов органлари ассоциацияси ва Ислом ҳамкорлик ташкилотидан ҳамда 43 та давлатдан 300 нафарга яқин кузатувчилар иштирок этмоқда.

Бундан ташқари, Президентликка номзодлар кўрсатган сиёсий партиялардан 35 минг нафардан зиёд кузатувчилар, оммавий ахборот воситаларининг вакиллари ҳам овоз бериш жараёнини кузатиб бормоқда.

Ҳозирга қадар жойлардан сайлов жараёни давомида сайлов қонунчилиги бузилиши ҳақида маълумотлар келиб тушмади.