Тошкент марказида, Кўкалдош мадрасасининг этагида жойлашган зиё маскани – китоб дўконларида шайх Муҳаммад Содиқ Муҳаммад Юсуф ҳазратларининг биронта китоблари қолмаганини маълум қилишди, деб хабар бермоқда «Info.islom.uz».
«Дўкондорларнинг айтишича, сўнгги бир неча кун ичида шайх ҳазратларининг китобларига бўлган талаб мисли кўрилмаган даражада кучайиб, пештахталар бўшаб қолган. Бу ҳам бўлса, халқимизнинг улуғ устозга бўлган меҳр-муҳаббати, ихлосининг намунасидир», − дейилади хабарда.
«Ҳилол-нашр» китоб дўконлари ишламай турган уч кун давомида юзлаб китобсеварлар, мухлислар келиб, афсус билан қайтиб кетаётган эдилар. Пойтахтдаги ва вилоятлардаги дўконлар ишга тушгач, аҳвол кутилганидан ҳам зиёда бўлди. Шу икки кун давомида дўконларда биронта китоб қолмади, сотувчиларнинг қўли қўлига тегмади, ташриф буюрганларнинг кети узилмади. Қайд этилишича, бир дақиқа ҳам бўш қолмаётган дўконларга келган китобхонлар «Янги китоблар қачон чиқади?», «Яна қайси китоблар чиқади яқин-орада?» деб тинмай сўраб туришибди.
«Улуғ аллома шайх Муҳаммад Содиқ Муҳаммад Юсуф ҳазратлари пайғамбарларнинг чинакам вориси сифатида тинмай ижод қилиб, улкан илмий мерос қолдирдилар. Ҳозирги кунда чоп этилган юздан ортиқ китобларидан ташқари, ‘Ҳилол-нашр’ нашриётига қўлёзмаси топширилган китоблари ҳам анчагина. Бинобарин, ҳали чоп этиладиган китобларимиз жуда кўп. Иншааллоҳ, тез кунда омборлардаги янги китобларимиз ҳам халқимизга тақдим этилади. Шу қадар илм-маърифатга ташна, китобсевар халқимиз бор экан, китобларимиз тўхтамай чоп бўлаверади, бу улкан илм булоғининг ҳикмат сарчашмаси айрилиқ доғига малҳам бўлаверади», − дейилган хабарда.
Изоҳ (0)