Чирчиқ шаҳрида яшовчи киши танишининг уйига меҳмонга бориб, у ерда бир йигит билан танишиб қолди. Гап асносида ҳамсуҳбатига Nexia’си борлигини, уни сотиб, Lacetti олмоқчилигини айтиб ўтди, деб хабар бермоқда «Постда» газетаси.
«Истасангиз танишларим бор. Сиз аввал пулни тайёрланг, икки ой деганда калит қўлингизда бўлади. Автосалондаги танишларим орқали хоҳлаган рангингиздаги Lacetti олиб бераман», − деди вазиятдан уддабуронлик билан фойдаланган йигит.
Бу йигит жиноятнинг турли кўчаларидан ўтган, бир неча бор судланиб ҳам ўзига тегишли хулоса чиқариб олмаганлардан бири эди. Бироқ чирчиқлик киши танимаган, билмаган одамига орадан бир неча кун ўтиб, 19 минг АҚШ долларини қўшқўллаб тутқазди. Фирибгар найранги ишончли чиқиши учун уяли телефонидан кимларгадир қўнғироқ қилиб, машина ҳақида гаплашди.
Шу тариқа айтилган вақт келди ҳамки машинадан дарак бўлмади. «Мижоз» ҳар қўнғироқ қилганида оз қолди, яна бироз сабр қилинг қабилида жавобларни олаверди. Ваҳоланки, фирибгар аллақачон пулларни ўз эҳтиёжлари учун сарфлаб юборганди. Орадан бир йилга яқин вақт ўтгач, ундан умидини узган йигит ҳуқуқ-тартибот идораларига мурожаат қилишга мажбур бўлди.
Дастлаб терговда фирибгар айбини тан олмади. У машина керак бўлса танишларимдан суриштириб кўраман деганини, лекин пул олмаганини айтди. Бироқ гувоҳларнинг кўрсатмаси ва юзлаштириш баённомалари билан мазкур жиноят тасдиғини топди.
Изоҳ (0)