Chirchiqda avtosalondan Lacetti olib beraman deb 19 ming dollarni o‘zlashtirgan firibgar qo‘lga olindi
Chirchiq shahrida yashovchi kishi tanishining uyiga mehmonga borib, u yerda bir yigit bilan tanishib qoldi. Gap asnosida hamsuhbatiga Nexia’si borligini, uni sotib, Lacetti olmoqchiligini aytib o‘tdi, deb xabar bermoqda “Postda” gazetasi.
“Istasangiz tanishlarim bor. Siz avval pulni tayyorlang, ikki oy deganda kalit qo‘lingizda bo‘ladi. Avtosalondagi tanishlarim orqali xohlagan rangingizdagi Lacetti olib beraman”, − dedi vaziyatdan uddaburonlik bilan foydalangan yigit.
Bu yigit jinoyatning turli ko‘chalaridan o‘tgan, bir necha bor sudlanib ham o‘ziga tegishli xulosa chiqarib olmaganlardan biri edi. Biroq chirchiqlik kishi tanimagan, bilmagan odamiga oradan bir necha kun o‘tib, 19 ming AQSh dollarini qo‘shqo‘llab tutqazdi. Firibgar nayrangi ishonchli chiqishi uchun uyali telefonidan kimlargadir qo‘ng‘iroq qilib, mashina haqida gaplashdi.
Shu tariqa aytilgan vaqt keldi hamki mashinadan darak bo‘lmadi. “Mijoz” har qo‘ng‘iroq qilganida oz qoldi, yana biroz sabr qiling qabilida javoblarni olaverdi. Vaholanki, firibgar allaqachon pullarni o‘z ehtiyojlari uchun sarflab yuborgandi. Oradan bir yilga yaqin vaqt o‘tgach, undan umidini uzgan yigit huquq-tartibot idoralariga murojaat qilishga majbur bo‘ldi.
Dastlab tergovda firibgar aybini tan olmadi. U mashina kerak bo‘lsa tanishlarimdan surishtirib ko‘raman deganini, lekin pul olmaganini aytdi. Biroq guvohlarning ko‘rsatmasi va yuzlashtirish bayonnomalari bilan mazkur jinoyat tasdig‘ini topdi.
