Европарламент Россиянинг ядро ва молия секторларига зарба беришни таклиф қилди

Европа парламенти ўзининг Украина ва унинг халқи билан бирдамлигини билдириб, мамлакат шарқида айирмачилар томонидан амалга оширилган террорчилик ҳаракатларини қоралади, дея хабар бермоқда «Корреспондент.net».

Шунингдек ЕП Москва Минск келишувларини ҳурмат қилиб, уни амалга оширишга ўз ҳиссасини қўша бошламагунича, Россияга нисбатан санкциялар сиёсатини сақлаб туришга чақирди. Бу ҳақда 15 январь куни Европарламент томонидан тасдиқланган резолюцияда айтилади.

Резолюцияда қайд этилишича, Россия Украинадаги вазиятни беқарорлаштириш бўйича янги хатти-ҳаракатлар бошлаган тақдирда, Европа Кенгаши янги чеклов чораларини кўриши керак, булар Россия ядро сектори ва Россия компанияларининг халқаро молиявий транзакцияларни амалга ошириш ҳуқуқини чеклашни ўз ичига олиши зарур.

Шу билан бирга, Еврокомиссия янги санкциялар қўлламаслик учун аниқ критерийларни белгилаб олишни таклиф этди. Булар орасида ўт очишни тўхтатиш келишувининг ижро этилиши, Украина ҳудудидан Россия қўшинларининг чиқариб кетилиши, маҳбуслар ва асирларнинг қайтарилиши, шунингдек Украинанинг барча ҳудудлар, жумладан Қрим устидан назоратининг тикланиши бўлиши керак.