Yevropa parlamenti o‘zining Ukraina va uning xalqi bilan birdamligini bildirib, mamlakat sharqida ayirmachilar tomonidan amalga oshirilgan terrorchilik harakatlarini qoraladi, deya xabar bermoqda “Korrespondent.net”.
Shuningdek YeP Moskva Minsk kelishuvlarini hurmat qilib, uni amalga oshirishga o‘z hissasini qo‘sha boshlamagunicha, Rossiyaga nisbatan sanksiyalar siyosatini saqlab turishga chaqirdi. Bu haqda 15-yanvar kuni Yevroparlament tomonidan tasdiqlangan rezolyutsiyada aytiladi.
Rezolyutsiyada qayd etilishicha, Rossiya Ukrainadagi vaziyatni beqarorlashtirish bo‘yicha yangi xatti-harakatlar boshlagan taqdirda, Yevropa Kengashi yangi cheklov choralarini ko‘rishi kerak, bular Rossiya yadro sektori va Rossiya kompaniyalarining xalqaro moliyaviy tranzaksiyalarni amalga oshirish huquqini cheklashni o‘z ichiga olishi zarur.
Shu bilan birga, Yevrokomissiya yangi sanksiyalar qo‘llamaslik uchun aniq kriteriylarni belgilab olishni taklif etdi. Bular orasida o‘t ochishni to‘xtatish kelishuvining ijro etilishi, Ukraina hududidan Rossiya qo‘shinlarining chiqarib ketilishi, mahbuslar va asirlarning qaytarilishi, shuningdek Ukrainaning barcha hududlar, jumladan Qrim ustidan nazoratining tiklanishi bo‘lishi kerak.
Izoh (0)