«Атлетико» жамоаси «Реал»га ноқулай рақибга айланганини яна бир марта исотлади. Испания кубогининг нимчорак финалида тўқнаш келиб қолган ушбу жамоалари ўртасидаги дастлабки ўйин «Висенте Калдерон» стадионида бўлиб ўтди. Диего Симеоне шогирдлари ўз олдиларига қўйилган стратегияни тўла-тўкис бажаришди ва илк ўйинда ишончли ҳисобда ғалаба қозонишди, деб хабар бермоқда «Stadion.uz».
Анчелотти Роналдуни заҳирада қолдирди. Ўйин бошида меҳмонлар «стандарт»дан ҳисобни очишганди. Бироқ тўп узатилаётган пайтда Бейл офсайдда бўлгани боис, у бекор қилинди. Олдиндан айтиш лозим, тўп бурчакдан етказилганидан кейин Рамос бош билан берган зарбасини (дарвозабон қайтарди) инобатга олмаганда, «матрасчилар» стандарт вазиятларда жуда яхши ҳимояланишди.
«Атлетико» иккинчи бўлимда ҳужумга кўпроқ борди. Рамос жарима майдончаси ичида Раул Гарсияни шарқ яккакурашлари услубида курагини ерга текказди. Бунинг учун ўз дарвозасига ҳалол пенальти олиб келди. Жабрланувчининг ўзи аниқ зарба билан ҳисобни очди. Ўйин тугашига 15 дақиқа қолганида мезбонлар ўзларининг хавфли қуроли — бурчак тўпидан унумли фойдаланишди: Хосе Мария Хименес бош билан дарвозани ишғол қилди.
Иккинчи бўлимда майдонга тушиб, ярим соат ўйнаган Роналду ҳам «Реал»га ёрдам бера олмади. «Атлетико» рақиб футболчиларига ҳеч қандай имконият бермади. «Қироллик клуби» 2014 йилдаги кетма-кет 22 та ғалабадан кейин 2015 йилда кетма-кет иккинчи мағлубиятини расмийлаштирди.
Жавоб ўйини бир ҳафтадан кейин «Сантяго Бернабеу»да бўлиб ўтади. «Реал» кейинги босқичга чиқиши учун 3 та тўп фарқи билан ғалаба қозониши талаб этилади. Эслатиб ўтамиз, ушбу жуфтли ғолиби «Барселона» − «Эльче» жуфтлиги ғолибига қарши чорак финалда тўқнаш келади.
Испания кубоги, 1/8 финал, дастлабки ўйин
«Атлетико» - «Реал» - 2:0
Голлар: 1:0 – 58, пенальти Гарсия, 2:0 – 76 Хименес.
«Атлетико» – Облак, Люка, Хименес, Годин, Гамес, Саул (Туран, 68), Суарес, Габи, Гарсия, Гризманн (Манжукич, 75), Торрес (Коке, 59).
«Реал Мадрид» – Навас, Арбелоа (Карвахал, 83), Рамос, Варан, Марсело, Иско, Хамес (Роналду, 63), Бейл, Хедира, Кроос, Бензема (Хесе, 75).
Огоҳлантиришлар: Марсело (27), Хедира (31), Рамос (57), Гамес (61), Гризманн (65), Габи (73), Гарсия (75), Годин (87), Карвахал (89).
Изоҳ (0)