Mercedes-Benz компанияси Лас-Вегасдаги CES 2015 электроника кўргазмасида F 015 Luxury in Motion («ҳаракатдаги ҳашамат») концепт-карини намойиш этди. Бу ҳақда «Motor.ru»га таяниб, «Kun.uz» хабар бермоқда.
Прототип тўлиқ автоном бошқарув тизими ва маиший электр тармоғидан қувват олиш имконига эга ёнилғи бўлмачиларига эга двигатель билан таъминланган.
F 015 Luxury in Motion габарити узунлиги 5220 миллиметр, кенглиги 2018 миллиметр, баландлиги 1524 миллиметрга тенг. Прототип архитектурасида карбонпластик, алюминий ва юқори сифатли пўлатдан фойдаланилган.
Умумий кучи 270 от кучига эга бўлган двигателдан иккита электромотор ўрин олган бўлиб, уларнинг ҳар бири учун энергия водород ва кислород ўртасидаги кимёвий реакция натижасида ҳосил қилинади. Бундан ташқари, агрегатлар литий-ионли аккумуляторлар тўпламидан ҳам қувват олиши мумкин. F 015 Luxury in Motion 6,7 сония ичида соатига 100 километр тезликка чиқиши мумкин, энг юқори тезлиги эса соатига 200 километрга тенг.
Баки ёнилғи билан тўлдирилган ва батареялари қувватлантирилган ҳолатда машина 1,1 минг километр йўл боса олади — бунда йўлнинг 200 километри аккумляторлар энергияси ҳисобига босиб ўтилади.
Автомобиль махсус камералар, лазерлар ва ультратовушли сенсорлар шарофати билан, шунингдек, жойнинг батафсил харитаси мавжудлиги сабаб тўлиқ электроника ёрдамида бошқарилиши мумкин.
Бундан ташқари, концепт-кардаги электроника йўлдаги бошқа автомобиллар, инфратузилма объектлари ва одамлар билан «мулоқотга киришиши» мумкин. Mercedes-Benz вакилларининг сўзларига кўра, «инсон ва автоном бошқарувдаги автомобиль ўртасида ишончли алоқалар ўрнатиш» фавқулодда муҳим аҳамиятга эга.
Масалан, автомобиль қўлда бошқарилаётган вақтда концепт-карнинг светодиод фаралари ва орқа чироқлари оқ рангда ёнади, автопилот ёқилганида эса улар кўк рангда жилоланади. Агар прототипнинг асбоблари йўлда пиёда борлигини аниқласа, радиатор панжарасидаги LED-элементлар қизил рангга киради ва автомобиль автоматик тарзда тўхтайди.
Айни вақтда, тизим авариявий ҳолатлардан қочиш мақсадида, ортдан яқинлашиб келаётган объект билан оралиқ масофани ҳисобга олган ҳолда тормозланишнинг изчиллигини назорат қилиб туради. Охир-оқибат, автомобиль овоз карнайчалари орқали йўлдан чиқиб қолган пиёдадан «йўлни бўшатишни» сўрайди.
F 015 Luxury in Motion’да ҳаракат йўналишига қарши орқа чиқиш эшиклари ҳам бўлиб, бу йўловчиларнинг қулай жойлашиши учун қилинган. Автомобиль автопилотда ҳаракатланаётган вақтда йўловчилар юзма-юз ўтира олиши учун машинанинг олд ўриндиқлари 180 даражагача бурилади.
Инсоннинг машина тизими билан муносабати олтита махсус монитор орқали амалга оширилади. Автомобильнинг функцияларини бармоқ билан экранга босиш орқали, шунингдек, қўл ишоралари ва кўз ҳаракати билан ҳам бошқариш мумкин.
2014 йилнинг кузида Mercedes-Benz келажакнинг ҳайдовчисиз юк машинаси — Future Truck 2025’ни намойиш этган эди. «Автомагистраллардаги инқилоб» деб таърифланган прототипнинг синовлари Магдебург яқинидаги трассада, «ҳақиқий йўл вазиятлари»да бўлиб ўтганди.
Тахминларга кўра, автопилотда ҳаракатлана оладиган ва серияли ишлаб чиқариладиган илк Мерседес S-Class Intelegent Drive бўлади. Унинг премьераси 2015 йил баҳорига мўлжалланган.
Изоҳ (0)