Хакерлар фош қилган ёзишмаларда Анжелина Жолига йўналтирилган ҳақоратлар борлиги аниқланди

Америкалик кинопродюсер Скотт Рудин Sony Pictures компанияси раисдоши Эми Паскалга ёзган хатида актриса Анжелина Жолини «қобилиятсиз ва талтайган» деб атади. Бу ҳақда «Газета.ru» хабар берди.

Sony Pictures’га уюштирилган хакерлик ҳужуми натижасида компания ходимларининг электрон ёзишмалари тарқалиб кетди. Улардан бирида Рудин Паскалга янги «Клеопатра» фильмида Жоли билан ҳамкорлик қилишни истамаслигини ёзган.

Шунингдек, дастлаб Sony чиқармоқчи бўлган, бироқ Universal Pictures’га ўтиб кетган «Стив Жобс» фильми баҳс-мунозара марказига тушган. Гап шундаки, Анжелина Жоли ушбу фильмга Дэвид Финчер режиссёрлик қилишига қарши бўлган. Шу муносабат билан Паскаль Рудинга мурожаат қилиб, ундан Жоли билан гаплашиб кўришни сўраган. Бунга жавобан у «бу учун вақтини сарфлашни истамаслигини» айтган.

«Яхшиси, у Финчернинг ишини чиппакка чиқаришидан аввал ундан жим бўлишини сўранг», — деб ёзган Рудин.