Kim Chen In o‘limi haqidagi “Intervyu” filmining noqonuniy nusxalarini 900 mingdan ortiq kishi yuklab oldi, deya xabar bermoqda “Segodnya.ua”.
Film YouTube Movies, Google Play, Xbox Video va kinolentaning rasmiy saytiga joylangach, butun dunyo bo‘ylab torrentlar foydalanuvchilari uning yuqori sifatli nusxalarini noqonuniy ravishda yuklashdi. Ularning 28 foizi AQSh hissasiga to‘g‘ri keladi.
Eslatib o‘tamiz, “Intervyu” deb nomlangan ushbu film syujetida AQSh televideniyesida ishlaydigan ikki muxbir Kim Chen Indan intervyu olish imkoniga ega bo‘ladi. Ular Shimoliy Koreyaga ketish safaridan avval maxfiy xizmat tomonidan KXDR rahbarini o‘ldirish haqida buyruq oladi. Filmdagi bosh rollarda Jeyms Franko (“O‘rgimchak odam”) va Set Rogen ishtirok etgan.
“Intervyu” 25-dekabr, Rojdestvo kunidan AQSh hududidagi 200 dan ortiq mustaqil kinoteatrlarda namoyish etila boshladi. Bunday qarorni kinolentani ishlab chiqargan Sony Pictures kompaniyasi qabul qildi.
Dastlab filmni AQShdagi 3 mingta kinoteatrda ko‘rsatish rejalashtirilgan edi. Sony Pictures kompaniyasi kompyuter tarmog‘iga hujum uyushtirgan xakerlar “Intervyu” premyerasi bo‘ladigan kinoteatrlarda 2001-yil 11-sentabrdagi kabi teraktlar uyushtirish bilan tahdid etgach, filmning 25-dekabrga mo‘ljallangan AQSh premyerasi bekor qilingan edi.
Izoh (0)