Ўзбекистонга Мустақил Давлатлар Ҳамдўстлиги (МДҲ) Ижроия қўмитаси раисининг биринчи ўринбосари Владимир Гаркун бошчилигида МДҲ Ижроия қўмитаси миссиясининг узоқ муддатли кузатувчилар гуруҳи ташриф буюрди, деб хабар бермоқда 2014 йилги сайловларни ёритиш бўйича Республика матбуот маркази.
Ўзбекистон Республикаси Марказий сайлов комиссиясининг таклифига биноан МДҲ Ижроия қўмитасининг кузатувчилар миссияси парламент сайловларига тайёргарлик кўриш ва уларни ўтказиш жараёни бўйича кузатувни амалга оширади.
Марказий сайлов комиссиясида миссия аъзолари билан учрашув бўлиб ўтди. Марказий сайлов комиссияси раиси М. Абдусаломов меҳмонларни Ўзбекистон Республикаси Конституцияси, сайловга оид қонунлар ҳамда Марказий сайлов комиссияси томонидан қабул қилинган Ўзбекистон Республикаси Олий Мажлиси, халқ депутатлари вилоят, туман ва шаҳар Кенгашлари сайловига тайёргарлик кўриш ва уни ўтказиш бўйича тадбирлар дастурига мувофиқ очиқ ва ошкора ўтказилаётган 2014 йилги сайлов кампаниясининг ўзига хос хусусиятлари билан таништирди.
МДҲ Ижроия қўмитаси кузатувчилар миссиясининг узоқ муддатли гуруҳи аъзолари, шунингдек, сайловда иштирок этаётган сиёсий партиялар, депутатликка номзодларнинг сайловолди ташвиқотини олиб бориш учун оммавий ахборот воситаларидан фойдаланишда тенг шароитлар яратилгани ҳақида маълумотга эга бўлишди.
Тадбирда таъкидланганидек, МДҲ кузатувчилари фаолиятини мувофиқлаштириш учун Тошкент шаҳрида миссиянинг штаби иш бошлайди ва кузатувларни ташкил этиш билан боғлиқ барча тадбирларни ўтказади. Миссия штаби сайлов жараёни бориши ҳақида материалларни йиғиш, ишлаш ва таҳлил қилиш, сайлов қонунчилигини ҳуқуқий экспертизадан ўтказиш ва телевизион дастурлар ҳамда босма ОАВда чиқаётган янгиликларни мониторинг қилиш, сиёсий партиялар сайловолди штаблари раҳбарияти, депутатликка номзодлар билан учрашувлар ўтказиш, кузатувчиларни ҳудудларга юбориш ва уларнинг иш тартибини белгилаш каби вазифаларни амалга оширади.
Владимир Гаркун журналистларга интервью берар экан, МДҲ Ижроия қўмитаси кузатувчилар миссияси фаолиятининг асосий принципи холислик эканини таъкидлади. МДҲ Ижроия қўмитаси миссиясининг фаолияти Ўзбекистон Республикаси миллий қонунчилиги, Ҳамдўстлик доирасида қабул қилинган ҳужжатларга қатъий амал қилган ҳолда сайловларни кузатиш бўйича халқаро тажриба асосида олиб борилади.
МДҲ Ижроия қўмитаси бўлим бошлиғи Евгения Слобода фикрига кўра, «Ўзбекистонда демократик сайловларни ўтказиш учун жуда кўп иш қилинган. МДҲ Ижроия қўмитасининг кузатувчилар миссияси олдинги парламент сайловларида ҳам қатнашган. Ўтган давр мобайнида Ўзбекистон миллий сайлов қонунчилиги анча ривожланиб, энг юқори демократик талабларга тўлиқ жавоб беради. Фуқароларнинг ўз хоҳиш-иродасини билдириш эркинлигини таъминлаш кафолатлари кучайтирилган».
Тадбир якунида меҳмонларга сайловга тайёргарлик кўриш ва уни ўтказишга доир барча тадбирларда, шунингдек, сайлов куни овоз бериш хоналарида ва овозларни санаб чиқишда қатнашиш ҳуқуқини берадиган тегишли намунадаги мандатлар топширилди.
Яқин кунларда Ўзбекистонга яна учта халқаро ташкилот – Шанхай ҳамкорлик ташкилоти, Ислом ҳамкорлик ташкилоти ва Бутунжаҳон сайлов органлари ассоциациясидан халқаро кузатувчилар келиши кутилмоқда. Шунингдек, Осиё, Европа, МДҲ, Африка ва Американинг 40 га яқин мамлакати вакиллари кузатувчи сифатида қатнашиш истагини билдирди. Улар орасида миллий парламент ҳамда сайлов органлари раҳбарлари ва аъзолари, жамоат ташкилотлари ҳамда оммавий ахборот воситалари ходимлари, шунингдек, олимлар ва сиёсатчилар бор.
Изоҳ (0)