Украина Хавфсизлик хизмати (УХХ) Чеченистон раҳбари Рамзан Қодировга нисбатан жиноий иш қўзғади. Бу ҳақда УХХ раҳбари маслаҳатчиси Маркиян Лубковский ўзининг Facebook’даги саҳифасида маълум қилди, деб ёзади ТАСС.
«УХХ Россия Федерацияси фуқароси Рамзан Қодиров томонидан Украина халқ депутатларига қарата террористик таҳдид қўлланилгани юзасидан жиноий иш очгани, шунингдек таҳдидлар йўналтирилган Украина парламенти аъзоларига нисбатан хавфсизлик чораларини кучайтирганини хабар қиламан», — деб ёзди Лубковский.
Эслатиб ўтамиз, 4 декабрга ўтар кечаси Чеченистон пойтахти Грознийга террорчилар ҳужум уюштиргач, Украина депутатларининг баъзилари жангариларни ёқлаб чиқди. Бундай баёнотлардан Рамзан Қодировнинг жаҳли чиқиб, республика ҳарбийларига ушбу депутатларни тутиб, Чеченистонга келтиришни буюрди. Қодировнинг айтишича, уларнинг Грознийдаги террорчилик ҳаракатларига алоқадорлигини текшириб кўриш керак.
Изоҳ (0)