Аввал хабар берганимиздек, 5 декабрь куни Тошкентда Ўзбекистон Республикаси Конституцияси қабул қилинган куннинг йигирма икки йиллигига бағишланган тантанали йиғилиш бўлиб ўтди. Унда Ислом Каримов маъруза қилди. Маърузанинг тўлиқ матни ЎзА томонидан эълон қилинди.
Президент ўз маърузасида айтишича, Ўзбекистонда маҳаллий акциядорлар билан бирга чет эллик инвесторларнинг ҳам акцияларга эга бўлаётгани мулкчиликнинг энг мақбул ва ўзини оқлаётган шаклидир.
«Ҳозирги вақтда юртимизда 90 дан ортиқ мамлакатнинг хорижий капитали иштирокида ташкил этилган 4 мингдан зиёд корхона муваффақиятли фаолият юритмоқда». — деди Ислом Каримов.
Бундай самарали лойиҳалар ҳақида гапириб, Президент машинасозлик соҳасида АҚШнинг «Женерал моторс», Германиянинг «МАН», «Клаас», Япониянинг «Исузу» компаниялари, нефть-газ соҳасида Жанубий Кореянинг «Лотте кемикал» ва «Когаз» компаниялари, кимё саноатида Испаниянинг «Максам» компанияси, тўқимачилик саноатида Сингапурнинг «Индорама», Жанубий Кореянинг «Дэу текстиль», «Янг вон», Швейцариянинг «Ритер» компаниялари, ахборот-коммуникация технологиялари соҳасида Хитойнинг «Хуавей» ва «ЗТЕ», озиқ-овқат саноатида Швейцариянинг «Нестле» компанияси, қурилиш материаллари ишлаб чиқаришда Германиянинг «Кнауф», Хитойнинг «Пенг Шенг», фармацевтика саноатида Швейцариянинг «Нобель» компаниялари ва шунингдек, бошқа кўплаб хорижий инвесторлар иштирокида ташкил этилган қўшма корхоналарни тилга олди.
Дунёда ном қозонган бундай компаниялар билан олиб бораётган ҳамкорлигимиз қисқа вақт ичида иқтисодиётимиз тармоқларини тубдан модернизация қилиш, маҳсулот ишлаб чиқаришни кенгайтириш ва унинг турини кўпайтириш, жаҳон бозорларига рақобатдош янги маҳсулотлар билан чиқиш имконини бермоқда.
Изоҳ (0)