Ҳозирги кунда телефон кабелларининг ўғирланиши оммавий тус олиб, катта муаммога айланмоқда. Бу ҳақда «Ўзбектелеком»нинг «Тошкент оқшоми» газетасида чоп этилган мурожаатида сўз боради, деб хабар беради «Кун».
«Кабель линияларини қасддан шикастлаш натижасида нафақат ‘Ўзбектелеком’ компаниясининг ‘ТШТТ’ филиали абонентлари бўлган жисмоний шахслар жабрланмоқда, балки бу ҳол ҳокимият ва бошқарув органлари, шошилинч хизмат, шаҳар ҳаётини таъминлаш корхоналари алоқа тизимларининг ҳам фаолияти бузилишига олиб келмоқда», — дейилади мурожаатда.
«Ўзбектелеком»нинг қайд этишича, кабелни ўғирлаш телефон тармоғининг узилишига, интернет тармоғи, маълумотнома-сервис ва ахборот хизматларидан фойдаланиш имкониятининг чекланишига сабаб бўлмоқда.
«‘Ўзбектелеком’ компанияси ‘ТШТТ’ филиали иншоотларни қўриқлаш масалаларини ҳал қилиш, ўз мижозлари учун алоқанинг шикастланиши оқибатларини камайтириш ҳамда тиклаш бўйича бор куч ва имкониятларини ишга солмоқда», — дейилади мурожаатда.
Шу муносабат билан, «Ўзбектелеком» кабеллар ўғирланишининг олдини олишда, шунингдек, ўғриларни қўлга олиш ва жазолашда аҳолини кўмак беришга чақирган. Шунингдек, у шаҳар линияли-кабель иншоотларидан рухсат берилмаган ҳолда фойдаланиш, кабеллар, канализация қопқоқларини ўғирлаш ҳоллари аниқланганда 102 ёки 233-69-95 телефонлари орқали хабар беришни сўраган.
«Ўзбектелеком»нинг «Тошкент оқшоми»даги мурожаатида кабелларни ўғирлаш кўлами рақамларда қанчалик акс этгани маълум қилинмаган.
Изоҳ (0)