Тошкент шаҳридаги Халқаро ҳамкорлик марказида 26 ноябрь куни Ўзбекистон Республикаси билан Россия Федерацияси ўртасида иқтисодий ҳамкорлик бўйича ҳукуматлараро комиссиянинг навбатдаги мажлиси бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Тадбирда икки мамлакатнинг ташқи иқтисодий алоқалар, савдо, сармоя, банк-молия, божхона, нефть-газ, автомобилсозлик, транспорт ва транспорт коммуникациялари, қишлоқ ва сув хўжалиги, атроф-муҳитни муҳофаза қилиш, маданият, соғлиқни сақлаш, меҳнат ва аҳолини ижтимоий муҳофаза қилиш, кичик бизнес ва хусусий тадбиркорлик, фан-таълим, авиаташув каби соҳаларда фаолият кўрсатаётган вазирлик ва идоралари, фирма ва компаниялари вакиллари иштирок этди.
Ўзбекистон Республикаси Бош вазирининг биринчи ўринбосари, комиссия ҳамраиси Р. Азимов икки мамлакат ўртасидаги ҳамкорлик барча соҳаларда, жумладан, иқтисодий йўналишда ҳам изчил ривожланиб бораётганини, икки давлат раҳбарларининг учрашувларида эришилган келишувлар бунда муҳим ҳуқуқий асос бўлиб хизмат қилаётганини алоҳида таъкидлади.
Анжуманда Ўзбекистон ва Россиянинг иқтисодий салоҳияти ва имкониятлари юзасидан атрофлича фикр алмашилди.
«Мамлакатларимиз ўртасидаги иқтисодий ҳамкорлик изчил тараққий этмоқда, — деди Россия Федерацияси Ҳукумати раисининг ўринбосари, комиссия ҳамраиси Д. Козак. — Ўзаро савдо айланмаси ҳажми йил сайин ошиб бормоқда. Мамлакатларимиз ишбилармонларининг ҳамкорлиги изчил ривожланмоқда. Икки томонлама савдо-иқтисодий ҳамкорлик мустаҳкам ҳуқуқий асосга эга экани диққатга сазовор. Бугунги кунда мамлакатларимиз ўртасида ёқилғи-энергетика, қурилиш ва кабель маҳсулотлари ишлаб чиқариш, қишлоқ хўжалиги соҳаларидаги ҳамкорлик тобора фаоллашмоқда, бу тармоқларда икки томон учун ҳам манфаатли лойиҳалар амалга оширилмоқда».
Мажлисда икки мамлакат ўртасида савдо-иқтисодий ва сармоявий ҳамкорликни янада ривожлантиришнинг истиқболли йўналишларига алоҳида эътибор қаратилди. Савдо, сармоя, банк-молия, нефть-газ, қишлоқ ва сув хўжалиги, транспорт ва транспорт коммуникациялари каби соҳалардаги алоқаларни янада кенгайтириш, қўшма корхоналарни, ўзаро товар айирбошлаш ҳажмини кўпайтириш, биргаликда ўзаро фойдали лойиҳаларни ишлаб чиқиш ва амалга ошириш масалалари муҳокама қилинди.
Изоҳ (0)