Toshkent shahridagi Xalqaro hamkorlik markazida 26-noyabr kuni O‘zbekiston Respublikasi bilan Rossiya Federatsiyasi o‘rtasida iqtisodiy hamkorlik bo‘yicha hukumatlararo komissiyaning navbatdagi majlisi bo‘lib o‘tdi. Bu haqda O‘zbekiston Milliy axborot agentligi xabar bermoqda.
Tadbirda ikki mamlakatning tashqi iqtisodiy aloqalar, savdo, sarmoya, bank-moliya, bojxona, neft-gaz, avtomobilsozlik, transport va transport kommunikatsiyalari, qishloq va suv xo‘jaligi, atrof-muhitni muhofaza qilish, madaniyat, sog‘liqni saqlash, mehnat va aholini ijtimoiy muhofaza qilish, kichik biznes va xususiy tadbirkorlik, fan-ta’lim, aviatashuv kabi sohalarda faoliyat ko‘rsatayotgan vazirlik va idoralari, firma va kompaniyalari vakillari ishtirok etdi.
O‘zbekiston Respublikasi Bosh vazirining birinchi o‘rinbosari, komissiya hamraisi R. Azimov ikki mamlakat o‘rtasidagi hamkorlik barcha sohalarda, jumladan, iqtisodiy yo‘nalishda ham izchil rivojlanib borayotganini, ikki davlat rahbarlarining uchrashuvlarida erishilgan kelishuvlar bunda muhim huquqiy asos bo‘lib xizmat qilayotganini alohida ta’kidladi.
Anjumanda O‘zbekiston va Rossiyaning iqtisodiy salohiyati va imkoniyatlari yuzasidan atroflicha fikr almashildi.
“Mamlakatlarimiz o‘rtasidagi iqtisodiy hamkorlik izchil taraqqiy etmoqda, — dedi Rossiya Federatsiyasi Hukumati raisining o‘rinbosari, komissiya hamraisi D. Kozak. — O‘zaro savdo aylanmasi hajmi yil sayin oshib bormoqda. Mamlakatlarimiz ishbilarmonlarining hamkorligi izchil rivojlanmoqda. Ikki tomonlama savdo-iqtisodiy hamkorlik mustahkam huquqiy asosga ega ekani diqqatga sazovor. Bugungi kunda mamlakatlarimiz o‘rtasida yoqilg‘i-energetika, qurilish va kabel mahsulotlari ishlab chiqarish, qishloq xo‘jaligi sohalaridagi hamkorlik tobora faollashmoqda, bu tarmoqlarda ikki tomon uchun ham manfaatli loyihalar amalga oshirilmoqda”.
Majlisda ikki mamlakat o‘rtasida savdo-iqtisodiy va sarmoyaviy hamkorlikni yanada rivojlantirishning istiqbolli yo‘nalishlariga alohida e’tibor qaratildi. Savdo, sarmoya, bank-moliya, neft-gaz, qishloq va suv xo‘jaligi, transport va transport kommunikatsiyalari kabi sohalardagi aloqalarni yanada kengaytirish, qo‘shma korxonalarni, o‘zaro tovar ayirboshlash hajmini ko‘paytirish, birgalikda o‘zaro foydali loyihalarni ishlab chiqish va amalga oshirish masalalari muhokama qilindi.
Izoh (0)