Тошкент вилоятида янги сайёҳлик йўналишлари очиш, меҳмонларни тарихий обидалар, миллий ҳунармандлик ва халқ амалий санъати намуналари билан таништириш учун қулай шарт-шароит яратиш борасидаги ишлар давом эттирилмоқда, деб хабар беради Ўзбекистон Миллий ахборот агентлиги.
Хусусан, Бўстонлиқ туманидаги Ҳожикент ва Юсуфхона қишлоқларида замонавий меҳмонхоналар қурилиб, фойдаланишга топширилди, «Оқтош» санаторийси таъмирланди. Чимён — Чорвоқ рекреацион зонасида янги лойиҳалар амалга оширилмоқда. Бу ерга келувчи меҳмонларнинг дам олиши, саёҳат қилиши учун яратилган шароитлар яхшиланмоқда. Хизмат кўрсатиш тури кўпайиб, сифати юксалмоқда.
Воҳада агротуризмни ривожлантириш бўйича ҳам салмоқли ишлар бажарилмоқда. Бўстонлиқ ва Чиноз туманларида балиқ маҳсулотлари кўргазмаси, «Чимён — экстрим» қишки спорт ўйини, «Чимён садоси» экологик саёҳат фестивалини анъанавий ташкил этиш режалаштирилган.
«Жорий йилнинг ўтган даврида вилоятимизга 2013 йилнинг шу даврига нисбатан ўн минг нафар кўп — 60 минг сайёҳ келди. Уларга кўрсатилган хизматлардан қарийб 27 миллиард сўм фойда кўрилди. Белгиланган вазифалар тўлиқ амалга оширилгач, ҳудудимизга келиб-кетувчи сайёҳлар ҳам, олинадиган фойда ҳам икки ҳисса ортиши кутилмоқда», — деди «Ўзбектуризм» миллий компаниясининг Тошкент вилояти минтақавий бўлими мутахассиси Жамшид Ғозиев.
Изоҳ (0)