АҚШнинг Фергюсон шаҳридаги тартибсизликлар жами 120 га яқин шаҳарга тарқалиши мумкин
АҚШнинг Миссури штати Сент-Луис судининг август ойида 18 ёшли афро-америкалик ўсмирни отиб қўйгани учун ҳибсга олинган полициячи Даррен Уилсонни оқлагани янги тартибсизликларга олиб келди. Бу ҳақда «Segodnya.ua» хабар бермоқда.
Фергюсон шаҳрида юзлаб одамлар норозилик билдириб, кўчаларга чиқди; шаҳарда тартибсизликлар бошланди. Фергюсон ҳаво ҳудудида эса парвозлар тўхтатиб қўйилди.
Айни дамда намойишчиларни АҚШнинг Вашингтон, Нью-Йорк, Чикаго ва Сиэтл сингари йирик шаҳарларидаги аҳоли қўллаб-қувватламоқда. Мазкур норозилик акцияси Америкадаги жами 34 штатнинг 90 шаҳрига, шунингдек, Канаданинг бир неча аҳоли турар-жой пунктларига тарқалиб кетди. Айрим маълумотларга кўра, тартибсизликлар жами 120 га яқин шаҳарга тарқалиши мумкин.
Тартибсизликлар юзага келишидан аввалроқ Миссури штати губернатори эҳтиёт чораси сифатида Фергюсонда фавқулодда ҳолат эълон қилганди. Бир неча кун аввал ёрдам бериш учун шаҳарга полициячилар ва Миллий гвардия ҳарбийлари киритилган эди.
АҚШ президенти Барак Обама, ўз навбатида, намойишчиларни норозилик акциясини тинч йўл билан ўтказишга, полициячиларни эса вазминликка чақирди.
Эслатиб ўтамиз, август ойида 18 ёшли қоратанли ўсмирни отиб қўйгани учун қамоққа олинган полициячи Даррен Уилсоннинг оқлангани 25 ноябрь куни эрталаб АҚШнинг Миссури штати Сент-Луис суди прокурори Боб Маккалок томонидан маълум қилинди.
