Ўзбекистон ва Қозоғистон йиллик савдо айланмасини ўзаро етказиб бериладиган товарлар номенклатурасини кенгайтириш ҳисобига 5 миллиард долларга етказмоқчи, деб ёзади «РИА Новости» Ўзбекистон Ташқи иқтисодий алоқалар, инвестициялар ва савдо вазири Элёр Ғаниевга таяниб.
Элёр Ғаниев аввалроқ Қозоғистон миллий иқтисодиёт вазири Ерболат Досаев билан учрашган эди.
Статистика маълумотларига кўра, Ўзбекистон ва Қозоғистон ўртасидаги савдо айланмаси 2013 йил якунлари бўйича 2012 йилга нисбатан 18 фоизга ошиб, 3,244 миллиард долларга етган. Шу йилнинг тўққиз ойи натижаларига кўра, савдо айланмаси ҳажми 25,7 фоизга ошиб, 3,061 миллиард долларни ташкил қилган.
Эслатиб ўтамиз, аввалроқ Ўзбекистон Республикаси Президенти Ислом Каримов Қозоғистон Республикаси Президенти Нурсултон Назарбоевнинг таклифига биноан 24 ноябрь куни расмий ташриф билан Остона шаҳрига келгани хабар берилган эди.
Ташрифнинг асосий воқеалари 25 ноябрга мўлжалланган. Президентлар тор доирада ва икки мамлакат делегациялари иштирокида музокаралар ўтказади.
Изоҳ (0)