Халқаро валюта фонди Кавказ ва Марказий Осиё (КМО) мамлакатлари учун ялпи ички маҳсулот ҳақиқий ўсиши 2014- ва 2015 йилларда тегишли равишда 5,5 ва 5,6 фоизларни ташкил этишини прогноз қилди. Бу ҳақда 4 ноябрь куни эълон қилинган ҳисоботга таяниб «РИА Новости» хабар берди.
Нашрнинг эслатишича, ХВФ октябрда ушбу кўрсаткичларнинг 6,2 ва 6,4 фоизга тенг бўлишини айтган эди. Фонд фикрича, КМО минтақасида иқтисодий фаоллик сусаймоқда. Бунга хусусан, асосий савдо шериклари ва пул ўтказмалари манбаларидан бири бўлган Россия билан боғлиқ минтақавий танглик, шунингдек КМОдаги қатор мамлакатларда ички талабнинг камайиб кетиши сабаб бўлмоқда.
Ҳисобот муаллифларининг таъкидлашича, Россия ва Украина ўртасидаги геосиёсий кескинликнинг кучайиб бориши КМО минтақаси учун қисқа ва ўрта муддатли оқибатлар келтириши мумкин.
ХВФ экспертлари фикрича, минтақадаги нефть экспортчилари бўлган Озарбайжон, Қозоғистон, Туркманистон ва Ўзбекистон учун 2014- ва 2015 йиллардаги иқтисодий ўсиш 5,6 ва 5,7 фоизни, нефть импортчилари — Арманистон, Грузия, Қирғизистон ва Тожикистон учун эса 4,6 ва 4,9 фоизни ташкил қилади.
Изоҳ (0)