Бухоро вилояти Ғиждувон туманидаги Зафаробод қўрғонида истиқомат қилувчи ака-ука осонгина даромадга эга бўлиш мақсадида тунги соат 01:00 ларда «саёҳат»га чиқди. Бу ҳақда Ўзбекистон Ички ишлар вазирлигининг «Постда» нашри хабар бермоқда.
Туманнинг Муғонак қишлоғидаги оғилхонада тўрт-беш бош қорамол ва бир нечта қўйга дуч келган ака-ука ўзларининг «УАЗ» русумли автомашинасига қўй-қўзиларни юклаб, изига қайтди. Ака-ука ўғирланган қўй-қўзиларни Ғиждувон мол бозорида пуллаб, жабрланувчига тўрт миллион сўм зарар етказди.
Шундан сўнг, ака-ука яна ишга киришиб, «Кўкча» қишлоқ фуқаролар йиғинининг чўл ҳудудида қаровсиз ҳолатда ўтлаб юрган ўн бошдан зиёд қўй ва эчкиларни ҳам оғирлади ва уларни тўрт-беш кундан сўнг қўшни қишлоқлик кишига арзон-гаровга сотиб юборди.
Ғиждувонлик ака-ука Оғитма овули яқинидаги чўлда қаровсиз ўтлаб юрган 13 бош қўй ва эчкини ҳам оғирлаб, сотиб юборди. Улар баҳор фаслида яна шу ҳудудга келиб, чўлдаги қўй-эчкиларни автомашинага юклашга киришаётганида Ғиждувон тумани IIБ ЖҚ ва УЖҚКБ тезкор вакиллари томонидан қўлга олинди.
Изоҳ (0)