Корея Республикаси ҳудудидан Шимолий Корея томон КХДР ҳукуматини айблайдиган тарғибот варақалари ортилган ҳаво шарларини учириш катта кўламдаги ҳарбий ҳаракатларга олиб келиши мумкин. Бу ҳақда КХДРнинг «Минчжу Чосон» («Демократик Корея») номли ҳукумат газетасида эълон қилинган мақолага таяниб, ТАСС хабар бермоқда.
Мақолада қайд этилишича, КХДР ҳозиргача Жанубий Корея ҳукуматини «акциялар қатъий қарши чораларга олиб келиши мумкинлиги ҳақида бир неча бор огоҳлантирган».
Пхеньян Корея Республикаси вакилларининг мамлакат ҳуқуқни муҳофаза қилиш органларида бундай ҳаво шарларини учиришни тўхтатиш учун қонуний асос йўқлиги ҳақидаги баёнотидан норози экани хабар қилинмоқда.
Айни дамда Пхеньян Сеулга варақалар ортилган ҳаво шарларини учиришни тўхтатиши учун босим ўтказиб, бу жиддий оқибатларга олиб келиши мумкинлиги билан таҳдид солмоқда. Шимолий Корея мазкур акцияни уруш эълон қилиш билан тенглаштирди.
Корея Республикаси бирлашиш бўйича вазири Рю Гиль Чжэ Жанубий Кореянинг бу борадаги позициясини эълон қилиб, ҳукумат бундай акцияларни тўхтата олмаслигини маълум қилди. «Фуқароларнинг варақалар жўнатиши — уларнинг мамлакат конституцияси томонидан таъминланган ҳуқуқидир», — деб таъкидлади вазир.
Изоҳ (0)