Москванинг Внуково аэропортида Франциянинг Total нефть компанияси президентининг самолёти ҳалокатга учраши бўйича суриштирув ишлари тўртта версия бўйича олиб борилмоқда, деб хабар берди Korrespondent.net.
Россия Тергов қўмитаси Москва минтақалараро транспорт суриштируви бошқармаси ҳаво ва сув транспорти тергови бўлими бошлиғи Иван Сибуланинг маълум қилишича, ҳалокат учувчиларнинг, Внуково аэропорти диспетчерларининг, самолёт билан тўқнашиб кетган қор тозаловчи машина ҳайдовчисининг айби билан ёки ноқулай об-ҳаво туфайли содир бўлгани эҳтимоллари бор.
Аввалроқ, Total президенти Кристоф де Маржери ва уч экипаж аъзоси ўрин олган енгил двигателли самолёт Внуково аэропортида қор тозаловчи машина билан тўқнашиб кетиши оқибатида самолётдаги барча кишилар ҳалок бўлгани, ҳеч қандай зарар кўрмаган қор тозаловчи машина ҳайдовчиси эса маст ҳолатда бўлгани аниқлангани хабар берилган эди.